بداية تستحق أن تُروى…
حكاية قلب يبدأ من جديد❤️
بقلم د.أمانى موسى
في حكايات بتاخد وقت طويل علشان تبدأ من جديد، وفي قلوب مهما طال غيابها، بتفضل محتفظة بمكان لشخص عمره ما كان مجرد عابر في حياتها..
النهارده 22 نوفمبر… تاريخ له مكانة مختلفة في قلبي، مش لمجرد إنه يوم مميز في التقويم، لكن لأنه بيحمل بين أيامه حكاية جديدة، وفرصة تانية للحياة، وبداية أتمنى تكون أجمل من كل اللي فات… بداية عنوانها النقاء، ودفاها المودة، وأساسها الرحمة، وأملها إن اللي جاي يكون أجمل وأصدق.
اكتشفت إن الرجولة مش صفة واحدة، وإن الحب مش مجرد كلام حلو بيتقال. الرجولة إنك تلاقي إنسان فيه كل صفة وضدها؛ قوي وقت ما تحتاج قوته، وحنين وقت ما تحتاج حضنه، شديد في مواقفه، ورقيق في مشاعره، غيور من غير ما يخنق، وعنده من الاحتواء اللى يخليك تحس إن الدنيا لسه بخير.
إنسان قد المسؤولية، تعرف إنه مش بس حبيب تشاركه لحظات الفرح، لكنه كمان ضهر وسند في الأيام الصعبة. وجوده مش مجرد وجود شخص جنبك، لكنه إحساس بالأمان، وإنك مش مضطر تواجه كل حاجة لوحدك.
يمكن السنين بتغير فينا حاجات كتير، والتجارب بتعلمنا إن الحب وحده مش كفاية، وإن أي علاقة حقيقية محتاجة احترام واحتواء وصدق ومسؤولية. محتاجة اتنين يعرفوا إن الاختلاف مش نهاية الطريق، وإن المودة والرحمة هما اللي بيخلوا القلوب تقدر تكمل.
المودة والرحمة مش إننا نعيش من غير خلاف، لكن إننا نعرف نختلف من غير ما نكسر بعض، ونزعل من غير ما نهون على بعض، ونفضل حريصين إن اللي بينا يفضل أكبر من أي خلاف.
وفي النهاية، يمكن أجمل هدية يمنحها لنا العمر مش إننا نرجع نعيش أيام فاتت، لكن إننا نلاقي فرصة نكتب أيام جديدة، بعقول أنضج وقلوب أكثر فهم ووعي.
مش كل بداية جديدة معناها إن اللي فات انتهى من الذاكرة، لكنها أحيانًا معناها إننا قررنا ندي للحياة فرصة أجمل.
من القلب للقلب… لكل قلب لسه مؤمن إن الحب الحقيقي مش مجرد مشاعر، لكنه مودة ورحمة وأمان وسند… وإن أجمل الحكايات ممكن تبدأ من جديد.
اللهم اجعل كل بداية تحمل لنا الخير، وكل لقاء يحمل الطمأنينة، وكل قلب وجد في الآخر سكنًا وأمانًا لا يعرف الفقد ولا الخذلان. ❤️