طالع.... نازل
طالع نازل.. حين تتغير الحياة ويبقى الأمان مسؤوليتنا
بقلم د. أماني موسى
في الحياة، بنعتاد على وجود أشخاص حوالينا، وبنبني معاهم تفاصيل يومنا، ونقسم المسؤوليات، ونرسم أحلامنا على أساس إن بكرة هيكون شبه النهارده.. بنعتبر وجود الزوج أو الزوجة، والبيت المستقر، والدخل الثابت، وتفاصيل الأسرة الصغيرة، أمورًا من المسلّمات اللي مش ممكن تتغير.
لكن الحقيقة إن الحياة مش خط مستقيم، ولا الظروف بتفضل ثابتة، وأحيانًا بتاخدنا من قمة الاستقرار إلى مواجهة واقع مختلف تمامًا، من غير مقدمات.
وده اللي بتخلينا نتوقف أمام شخصية «داليا» في مسلسل «طالع نازل»، ونشوف الحكاية من زاوية أبعد من مجرد فقدان زوج.
داليا بعد وفاة زوجها ما فقدتش شريك حياتها وبس، لكنها وجدت نفسها أمام مسؤوليات جديدة، وأعباء نفسية ومادية واجتماعية، وحياة محتاجة منها تعيد ترتيب كل تفاصيلها. بقت مطالبة تقوم بأدوار كتير في وقت واحد، وتواجه واقع ما كانتش مستعدة له، وتكتشف إن غياب شخص واحد ممكن يغير شكل حياة أسرة بالكامل.
وهنا لازم نسأل نفسنا: هل إحنا بنجهز أولادنا لمواجهة الحياة، ولا بنربيهم على إن الأمان معناه إن كل حاجة هتفضل زي ما هي؟
أحيانًا بنبالغ في إحساسنا بالاستقرار، لدرجة إننا بننسى إن الظروف ممكن تتغير، وإن الإنسان ممكن يواجه فقدانًا أو مرضًا أو أزمة مادية أو تغيرًا مفاجئًا في شكل حياته.
مش المطلوب إننا نعيش أولادنا في حالة خوف من المستقبل، لكن المطلوب إننا نعلمهم إن الاعتماد على النفس قوة، وإن تحمل المسؤولية ضرورة، وإن كل فرد في الأسرة لازم يكون عنده القدرة على المشاركة والمساندة وقت الأزمات.
لازم نعلم أبناءنا إن الأمان مش شيء مطلق، وإن وجود الأب أو الأم أو أي شخص بنستند عليه في حياتنا نعمة كبيرة، لكنها مش ضمان إن الأيام هتفضل بنفس الصورة.
والأهم من كل ده إننا ما نربطش إحساس أولادنا بالأمان بفكرة إن الظروف عمرها ما هتتغير.
ممكن ما نقدرش نوعدهم إن الحياة هتفضل سهلة، أو إنهم مش هيواجهوا أيامًا صعبة، لكن نقدر نوعدهم إننا هنكون جنبهم، وإنهم مش هيواجهوا التغيير لوحدهم، وإن الأسرة الحقيقية مش مجرد بيت بيجمعنا، لكنها روح بتسندنا وقت الانكسار.
الأسرة مش مسؤولية شخص واحد، والاستقرار مش مجرد وجود مصدر دخل أو سقف يحمينا من المطر، الاستقرار الحقيقي إن كل فرد يعرف إن له دورًا، وإن غياب أحد أفراد الأسرة لا يعني انهيار الباقين، وإن المحبة لازم تتحول إلى مواقف ومساندة وتحمل للمسؤولية.
يمكن أجمل درس في حكاية داليا إننا لازم نراجع مفهومنا عن الأمان، ونفهم إننا مش بنحمي أولادنا من الحياة بأننا نوفر لهم كل شيء، لكن بنحميهم لما نعلمهم إزاي يواجهوا الحياة بكل تقلباتها.
لأن الدنيا فعلًا طالع نازل.. يوم فوق ويوم تحت، يوم فيه فرحة ويوم فيه اختبار، ومش دايمًا هنقدر نمنع عنها تقلباتها، لكن نقدر نربي أولادنا على القوة، ونزرع جواهم اليقين إن الأسرة الحقيقية هي اللي بتفضل سند لبعضها مهما اتغيرت الظروف.
وفي النهاية، مش أهم وعد نقدمه لأولادنا إن الدنيا مش هتوجعهم، لكن أهم وعد إننا مش هنسيبهم يواجهوا وجعها لوحدهم.
من القلب للقلب.. الأمان مش إن الحياة ما تتغيرش، الأمان إننا نفضل لبعض مهما اتغيرت الحياة.