✍🏻بقلم د أمانى موسى 

30 أكتوبر… يوم كان دايمًا له مكانة مختلفة في قلبي، يوم من أهم أيام حياتي، كنت بستناه كل سنة بفرحة وذكريات وإحساس خاص مايتوصفش بالكلام.

لكن السنة دي كان مختلف… جه وأنا مش أنا، والفرحة اللي كانت بتسبق اليوم اختفت، وحل مكانها إحساس تقيل، كأن الأيام قررت تختبر قدرتي على الاحتمال في وقت كنت فيه محتاجة أرتاح شوية.

الغريب إن التاريخ هو هو، واليوم هو نفس اليوم، لكن إحنا أحيانًا بنتغير لدرجة إن الحاجات اللي كانت بتفرّحنا ماعادش ليها نفس الطعم، والأماكن اللي كانت بتلمّنا بذكريات حلوة بنعدّي عليها وكأننا بنشوفها لأول مرة.

يمكن أكتوبر السنة دي كان أكتر من مجرد شهر في التقويم… كان حكاية طويلة من الانتظار، ومحاولات الصبر، ومواقف كشفت حاجات ماكنتش أتمنى أعرفها، وحقايق كنت أتمنى تفضل بعيدة عن عيني.

بدأت الحكاية بأيام عادية، صباحات متشابهة، وفنجان قهوة يبرد قبل ما أخلصه، ورسائل كتبتها ومسحتها، وأحاديث كتير كنت بخبي وراها كلام أكبر من قدرتي على البوح.

استنيت حاجات ماحصلتش، وفرحت قدام الناس في أوقات ماكانش قلبي فيها بخير، وضحكت وأنا جوايا أسئلة كتير مالهاش إجابات.

ومع الوقت، اكتشفت إن التعب مش دايمًا بيكون من كثرة المسؤوليات أو صعوبة الأيام، ساعات بيكون من ناس حبيناهم بصدق، واطمنا ليهم، واعتبرنا وجودهم جزء من أماننا.

أصعب حاجة مش إن حد يختلف معاك، ولا إن موقف يزعلك… الأصعب إن ثقتك تتغير في ناس كنت بتحطهم في مكانة كبيرة، وإنك تكتشف إن الصورة اللي كنت شايفها مش هي الحقيقة اللي كنت بتتمناها.

وساعتها بتبدأ تراجع حاجات كتير… مشاعر، مواقف، كلام، وذكريات، وتسأل نفسك: هو أنا اتغيرت؟ ولا أنا أخيرًا شفت حاجات ماكنتش عايز أشوفها؟

أكتوبر علّمني إن مش كل اللي بنحبهم بيقدروا يحافظوا على حبنا، وإن مش كل اللي بنمنحهم الثقة بيكونوا قدّها، وإن أحيانًا الصمت بيكون أبلغ من عتاب طويل، خصوصًا لما نحس إن الكلام مش هيغيّر حاجة.

ومع آخر أيام الشهر، لقيت نفسي ببص ورايا، وبحاول أفهم إيه اللي حصل لكل المشاعر دي، وإزاي شهر واحد قدر يخليني أحس بكل التغيير ده.

انتهى أكتوبر… وانتهيت أنا معه، أو يمكن انتهت جوايا حاجات كتير كنت فاكرة إنها مش هتنتهي أبدًا.

وداعًا أكتوبر…

كنت أتمنى ترحل وأنت واخد معاك التعب، وتسيب لي راحتي، وضحكتي القديمة، وقلبي اللي كان بيعرف يطمن من غير خوف، وثقتي اللي كنت بديها للي بحبهم من غير ما أحسب حساب للخذلان.

لكن مش كل اللي بنتمناه بيحصل، ومش كل الحكايات بتكمل زي ما رسمناها، ومش كل النهايات بنكون مستعدين ليها.

ومع ذلك، مش عايزة أخرج من الشهر ده وأنا شايلة غضب أو عتاب، كفاية اللي اتعلمته، وكفاية إن بعض الحقايق مهما كانت موجعة، بتخلينا نفهم نفسنا واللي حوالينا بشكل مختلف.

يمكن أكون تعبت، ويمكن الأمل جوايا قلّ، ويمكن الثقة محتاجة وقت طويل عشان ترجع، لكن لسه جوايا يقين إن ربنا قادر يبدّل الأحوال، ويعوّض القلوب اللي صبرت، ويفتح أبواب ماكنّاش نتخيل إنها هتتفتح.

هامشي من أكتوبر بكل اللي حصل فيه… مش هنكر وجعه، ولا هنسى أيامه، لكن مش هاسمح له يكون آخر حكاية حلوة في عمري.

فبعض الشهور بتنتهي، لكن أثرها بيفضل جوانا… وبعض الوجع بيغيّرنا، لكنه مش لازم يطفّي النور اللي جوانا.

وداعًا أكتوبر… لعل نوفمبر يحمل لنا من لطف ربنا ما ينسينا قسوة الأيام.

فالأجمل لم يأتِ بعد… مهما تأخر.

من_القلب_للقلب #وداعًا_أكتوبر