ليلة القدر… بين دعوة صادقة وقدر يتغير

✍🏻بقلم د.أمانى موسى 

فى آخر ليالى رمضان، بيكون فى إحساس مختلف فى القلوب… هدوء فى الليل، ودعوات طالعة من قلوب الناس، لأن كلنا مستنيين ليلة عظيمة يمكن تغير أقدارنا للأفضل… ليلة القدر.
الليلة دى ربنا جعلها أعظم ليلة فى السنة، وقال عنها إنها خير من ألف شهر. يعنى العمل الصغير فيها ممكن يبقى عند ربنا أعظم من سنين طويلة. ركعتين بنية صادقة، دعوة من القلب، أو حتى استغفار فى هدوء الليل… كل ده ممكن يكون له وزن كبير عند ربنا.
يمكن أجمل حاجة فى ليلة القدر إنها بتفتح باب الأمل لكل الناس. اللى عنده همّ، واللى نفسه فى رزق، واللى بيدعى بحاجة من سنين… كل واحد فينا بييجى الليلة دى وهو شايل فى قلبه دعوة. يمكن دعوة لراحة بال، أو شفاء، أو بداية جديدة ربنا يكتبها لحياته.
وفى الليلة دى، بيكون الهدوء مختلف. ناس بتصلى، وناس بتدعى، وناس قاعدة مع ربنا بكلمة يا رب. مفيش كلام كتير مطلوب… ربنا أقرب لقلوبنا من أى وقت.
علشان كده حاول ما تضيعش الليالى دى. حتى لو مش قادر تعمل عبادات كتير، يكفى قلب حاضر مع ربنا. صلى ركعتين، استغفر، وكرر الدعاء اللى علمه النبى ﷺ:
"اللهم إنك عفو تحب العفو فاعفُ عنّا."
يمكن لحظة صدق فى ليلة القدر… تكون بداية فرج كبير، أو تغيير جميل فى حياتك، وربنا يكتب لك فيها من الخير أكتر مما كنت تتمنى. 🌙