اعرف قيمتك وامشى مطمن
بقلم د.أمانى موسى احترام الذات مش كلمة كبيرة بنقولها وخلاص، ده إحساس داخلي بيقولك إنك تستاهل معاملة كويسة، وتستاهل تختار اللي يريحك من غير ما تبرر للناس كل خطوة.لما تحترم نفسك، هتعرف تقول “لأ” في الوقت الصح، من غير ما تحس بذنب....
بقلم د.أمانى موسى
احترام الذات مش كلمة كبيرة بنقولها وخلاص، ده إحساس داخلي بيقولك إنك تستاهل معاملة كويسة، وتستاهل تختار اللي يريحك من غير ما تبرر للناس كل خطوة.
لما تحترم نفسك، هتعرف تقول “لأ” في الوقت الصح، من غير ما تحس بذنب. هتعترف بغلطك، بس من غير ما تكسّر نفسك. هتسعى تطور من نفسك، بس من غير ما تفضل تبص لغيرك وتقارن حياتك بحياتهم.
اللي بيحترم نفسه ما يقبلش إهانة باسم الحب، ولا تقليل باسم الهزار، ولا استنزاف باسم التضحية. لأنه عارف إن كرامته مش موضوع نقاش، وإن قيمته مش مستنية حد يوافق عليها.
احترام الذات بيخليك أهدى، أوضح، وأقوى. بيخليك تختار ناس تريحك، ومكان يقدّرك، وحياة شبهك. ولما تقدر نفسك صح، الناس هتتعلم تتعامل معاك بنفس الطريقة.
في الآخر… احترامك لنفسك هو أول خطوة لأي علاقة ناجحة، وأول باب للراحة النفسية.
اللي يعرف قيمته، عمره ما يرضى يكون اختيار مؤقت في حياة حد.
