أمى .. .. عيد من غيرك وحنين مالوش نهاية

✍🏻 بقلم د أمانى موسى

أمي…
مش عارفة أبدأ أقول إيه… ولا أبدأ منين،
لأن غيابك مش مجرد غياب… ده حتة مني اتشالت وسابت مكانها وجع ساكت.

النهارده عيد الأم…
والناس بتجري على حضن أمهاتها،
وأنا بجري على ذكرياتك…
أفتحها واحدة واحدة، كأني بلمس إيدك من جديد.

وحشاني يا أمي…
مش بس كشخص…
وحشاني كأمان، كدعوة كانت بتسبقني،
كقلب كان شايل همي حتى قبل ما أحكي.

أنا كنت فاكرة إن وجودك حاجة عادية…
لحد ما غيابك علّمني إنك كنت النعمة كلها.

في حاجات كتير ما اتقالتش،
حضن كان ممكن أطوله،
وكلام كان ممكن أقوله… وسكت.
والنهارده بدفع تمن كل لحظة عدت من غير ما أقولك:
"أنا بحبك" كفاية.

أمي…
بيقولوا اللي بيموت بيرتاح،
بس اللي بيفضل هو اللي بيتعب…
وأنا تعبت من الشوق، من الحنين،
من كل موقف محتاجة فيه صوتك ومش لاقياه.

بس رغم الوجع…
في سلام غريب جوايا،
عارفة إنك عند رب كريم،
أحن عليكي مني… وأرحم بيكي من الدنيا كلها.

فكل سنة وانتي طيبة يا أمي…
بس مش هنا… هناك، في الجنة،
في مكان يليق بقلبك اللي عمره ما أذى حد.

ولو في دعوة بتوصل…
فأنا كل يوم بدعيلك،
مش عشانك…
عشان أنا اللي محتاجة أفضل حاسة إن بينا خيط لسه ما اتقطعش.

وحشتيني…
وهتفضلي دايمًا أجمل حكاية في قلبي،
وأصعب فقد في عمري كله انتى  ووالدى رحمة الله عليه🤍