حين يتعب القلب بصمت

بقلم د.أمانى موسى 
مش كل وجع بيتقال…
في وجع بيستخبى ورا ابتسامة هادية، وكلمة “أنا كويس” اللي بنقولها وإحنا مش كويسين خالص.
في ناس بتتعب من جواها، بس مبتحبش تشتكي. تفضل شايلة، تتحمل، وتعدّي الأيام وهي ساكتة. يمكن علشان متقلقش حد، أو علشان اتعودت إن محدش هيفهم. بس الحقيقة إن القلب لما بيتعب، بيبقى محتاج يتسمع… مش يتحاكم.
أصعب إحساس إنك تحس إنك لوحدك وإنت وسط الناس. إنك تحكي نص الحكاية وتسكت، علشان مش لاقي أمان يكملها. تبقى مستني سؤال صادق: “مالك؟” مش سؤال عابر بيتقال وخلاص.
التعب مش دايمًا صريخ… ساعات بيبقى هدوء زيادة عن اللزوم. انسحاب مفاجئ. قلة كلام. أو حتى ضحكة أعلى من الطبيعي تخبي اللي جوا. والقلب الطيب بالذات، هو أكتر قلب بيتعب… لأنه بيحس بزيادة، وبيسامح بزيادة، وبيستحمل فوق طاقته.
بس لازم نعرف إن السكوت مش حل دايم. وإن اللي بيحبنا بجد، مش هيزهق من وجعنا، ولا هيقلل منه. بالعكس… هيقرب أكتر. لأن المشاركة مش ضعف، دي راحة. والاعتراف بالتعب بداية شفاء.
لو قلبك تعبان… متكسفش تقول.
ولو حد حواليك باين عليه ساكت زيادة… اسأله بصدق. يمكن كلمة منك تفرق. يمكن حضن يطمنه. يمكن إحساس بالأمان يرجّع له روحه.
القلب لما يتعب بصمت، مش بيكون عايز معجزات…
هو بس عايز حد يسمعه قبل ما يسكت خالص. 💔