الشك والغيرة… خيط رفيع بين الحب والوجع
✍🏻بقلم د.أمانى موسىالغيرة إحساس طبيعي جدًا.لما نحب حد، طبيعي نخاف عليه… ونخاف نفقده. الغيرة وقتها بتبقى معناها إن الشخص ده مهم عندنا، وإن مكانته كبيرة في قلبنا.لكن الشك حاجة تانية خالص.الشك مش دايمًا بيبقى بسبب موقف واضح، أوقات بيبقى خوف جوانا إحنا....
✍🏻بقلم د.أمانى موسى
الغيرة إحساس طبيعي جدًا.
لما نحب حد، طبيعي نخاف عليه… ونخاف نفقده. الغيرة وقتها بتبقى معناها إن الشخص ده مهم عندنا، وإن مكانته كبيرة في قلبنا.
لكن الشك حاجة تانية خالص.
الشك مش دايمًا بيبقى بسبب موقف واضح، أوقات بيبقى خوف جوانا إحنا. خوف من إننا نتوجع، أو إننا نتحط في نفس الوجع اللي عشناه قبل كده.
الغيرة تقول:
"أنا بزعل لما بحس إني مش في الصورة."
لكن الشك يقول:
"أكيد في حاجة مستخبية عني."
الغيرة ممكن تتحل بكلمة صريحة، باهتمام بسيط، بتصرف يطمن.
لكن الشك لو كبر، يخلي كل حاجة تتحسب… كل مكالمة، كل ضحكة، كل تأخير. ونفضل ندوّر على دليل يثبت خوفنا.
أصعب حاجة إن الشك ساعات بيكون ظالم.
نحاسب حد جديد على أخطاء حد قديم.
ونطلب أمان وإحنا مش مستعدين ندي ثقة.
الحب محتاج وضوح.
ومحتاج إننا نتكلم بدل ما نفترض.
لو غيران قول إنك غيران…
لو متضايق قول السبب…
لو محتاج تطمن، اطلب ده بصراحة.
العلاقة اللي فيها راحة، مش معناها مفيش غيرة.
لكن معناها إن في ثقة أكبر من أي خوف.
في الآخر…
اللي بيحب بجد، ما يرهقش نفسه بالشك.
يختار يطمن… ويطمن اللي معاه.
