5 خطوات لصنع الشا ور جيل في بيتك

تقدمها لكم.. شيرين مرسي {{صابون سائل لغسيل الأيدي وللاستحمام}} وممكن نستعمل مع مكوناته بواقي الصابون ⏪المقادير :- - 100 جرام تكسابون - 5 ملاعق كبيرة ملح طعام - 3 لتر ماء - 200 جرام جلسرين - 100 جرام زيت زيتون او اي زيت تفضلوه - ملعقة كبيرة فورمالين - 200 جرام معطر او الكمية حسب الرغبه - اي لون تفضلوه يتناسب مع الرائحه - 2 ملعقة كبيرة تيلوز بواقي الصابون : (نصف لتر ماء مذاب فيه بواقي الصابون المتبقيه عندنا ونرفعها على النار الى ان تذوب).  ⏪الطريقة :- - في وعاء بلاستيك نضع التكسابون مع الملح ويقلبوا الى ان يمتزجوا تماما (التقليب دايما يكون في اتجاه واحد) - نضيف عليهم الماء ونقلب (المرحله دي بتاخذ وقت كتير شويه عشان يذوبوا) - لو كان عندنا بواقي صابون وذوبناها على النار نضيفها عليهم ، لو مفيش مش مهم نكمل باقي الطريقة - نضع الجلسرين ونقلب - نضع الزيت ونكمل تقليب - نضع الفورمالين وبرضو بنقلب - نضع الرائحه واللون ونفضل نقلب - لما نلاقي المكونات امتزجت جيدا ، نضيف التيلوز وبرضو نقلب تاني شويه. - التقليب بياخذ وقت شويه ممكن اولادكم يساعدوكم. - نسيب السائل شوية لما الرغوه اللي عملها تهدى وقوامه يتقل ، ثم يعبأ في زجاجات شاور جل قديمة المقدار بيعمل تقريبا 3.5 او 4 لتر في النهاية ............................................................... - المواد الكيماوية دي حتلاقوها عند بتوع المواد البتروكيماويات اللي في شارع الجيش في العتبة والشارع كله مليان محلات ، وكلهم عرفين التركيبات بتتعمل ازاي والنسب بتاعتها كمان - بالنسبة لباقي المحافظات خارج القاهرة تقدروا تسألوا بتوع المنظفات فين تجار المواد البتروكيماوية ، او اسألوا طلبة كلية العلوم او الصيدليات او تجار الاسمدة. واليكم شرح كل مادة وبتستعمل في ايه :- - التكسابون : هي العنصر الاساسي في صناعة الصابون ، وبتدخل في عمل سائل الستحمام والايدي وغسيل الملابس وغسيل الاطباق وغيرهم التيلوز : هي مادة بتثقل القوام ، كل ما زودناها كل ما قوام السائل بقا تقيل. الفورمالين : هو مادة حافظة ، ضرورية عشان لو عملنا كمية تقعد عندنا فترة ومتعفنش او المكونات تفصل عن بعضها ، وممكن الاستغناء عنها لو حتعملوا كمية قليلة اوي وتستخدم مباشرة. اللون البودره ده صناعي طبعا مش طبيعي وممكن الاستغناء عنه ، ونراعي لو حطينا لون يمشي مع الريحه ، ذي الاخضر لرائحة التفاح. الجلسرين ضروري جدا لطراوة البشرة. الزيت ضروري جدا لنعومة البشرة. ((التكسابون والملح والماء)) هم المكونات الاساسية في صناعة اي سائل تنظيف ، الفرق في الأضافات التانية والنسب اللي بنحطها عليهم. مصانع وشركات مواد التنظيف بتنفق الملايين عشان تعمل ابحاث وتجارب للوصول بالمنتج للصورة الجيدة اللي بتوصلنا دي ، فطبيعي احنا مهما عملنا مش حنوصل للشركات العالمية دي وخصوصا في رائحة المنتج وثباتها ، اما من ناحية التنظيف فالمنتجات المصنعة بيتي قد تفوق الجاهزة في التنظيف لاننا احنا اللي بنتحكم في الاضافات وممكن نزودها ونخلي المسحوق مركز اوي ، اما اللون او الرائحه او القوام فالمنتجات البيتي اقل جودة ،،،، انا بقول لكم بصراحة عشان محدش يقول شيرين بتضحك علينا ،،،،، انا حاولت الاقي او اعمل رائحه ذي روائح الشاور بتاعه صن سيلك او روائح البرسيل الاصلي بس مفيش ريحه عند بتوع البتروكيماويات تحاكي روائح الشركات العالمية دي ، عشان محدش يضحك عليكم ويقولكم دي ريحه البرسيل الاصلي او ريحة الداوني الاصلي ، كلها روائح مصنعه وطبعا مش هي بتاعة الشركات الاصلية ، وكمان التجار بيبيعوها غاليه جدا كتبتلكم الاسعار تحت صورة المكونات ،،،، بس الفرق في السعر حيخلينا نحب ريحة المنتجات البيتي..