اللهم سخر لي الأرض ومن عليها 🤍

✍🏻 بقلم د أمانى موسى 
في لحظة هدوء كده… لما الدنيا بتضيق بينا، والطرق بتتلخبط قدامنا، بنرفع إيدينا ونقول: "اللهم سخر لي الأرض ومن عليها"… دعاء بسيط، لكنه مليان طمأنينة وأمل.
الفكرة مش إن الدنيا كلها تمشي على مزاجنا، لكن إن ربنا يلين لنا القلوب، ويفتح لنا الأبواب، ويسهّل لنا الطريق حتى لو كان صعب. إنك تدخل مكان تلاقي حد يساعدك من غير ما تطلب، أو كلمة طيبة تيجي في وقت أنت محتاجها جدًا… دي مش صدفة، دي تسخير من ربنا.
التسخير مش دايمًا بييجي في صورة حاجات كبيرة، بالعكس… ساعات بيكون في تفاصيل صغيرة:
شخص يعدي في حياتك يغيّرلك تفكيرك،
حد يقف جنبك في وقت ضيق،
أو حتى موقف يعلمك درس ينقذك بعد كده.
ولما تدعي الدعاء ده، خليك فاكر إنك كمان لازم تكون سبب في تسخير الخير لغيرك. يعني زي ما بتطلب من ربنا يسخّر لك الناس، حاول تكون أنت كمان شخص سهل، طيب، وواقف جنب غيرك. الخير بيرجع… ويمكن يرجع لك أضعاف.
والمعنى الأعمق بقى… إنك تبقى مطمّن إن ربنا قادر يهيأ لك كل حاجة، حتى الحاجات اللي شايفها مستحيلة. يمكن الطريق مش واضح دلوقتي، بس ربنا شايف الصورة كاملة، وبيسوق لك الخير بطريقة أنت مش متخيلها.
فكل ما تحس إن الدنيا تقيلة عليك، قولها من قلبك:
"اللهم سخّر لي الأرض ومن عليها"
وإوعى تشك لحظة… إن ربنا هيختار لك اللي فيه خيرلك، حتى لو جه بشكل غير اللي كنت متوقعه.
وفي الآخر… اللي مع ربنا، عمره ما يضيع

 🤍