عالية إبراهيم تكتب: الإحساس بالوحده

رغم ان الناس اللي حوالينا بتزيد وعلاقتنا بتوسع لكن في ظاهره غريبه ان الوحده كمان بتزيد وبتقطع صلات الناس ببعضها لان التكنولوجيا فتحت ابوابها علي مصراعيها وقربت ناس كتير من بعض.. لكن مش عايشين حياة بعض غير علي المواقع فقط اللي هي قشور الحياه لكن مضمونها منعدم ولذلك تخلو العلاقات من الحب والمعرفه الذاتية لانها أسلاك متفرقة وعالم افتراضي وخيالي.. ومش شرط عشان حواليك ناس كتير تعرف تتكلم معاهم وتحس براحه نفسيه وتفتح قلبك وحياتك احيانا الناس الكتير علاقات ومعارف بتكون مصالح ومعانى بعيده عن الصداقه والمحبه الحقيقيه بالرغم من كم الناس اللي حوالينا كل واحد فينا نفسه في حد يفهمه ويفضفض معاه يقرأ اللي جواه من غير ما يتكلم.. ميزعلش لما تبعد عنه ويلتمس لك العذر ويدور عليك عشان انت نصه التانى ولما يبعد عنك تحس بالوحده والغربه مهما كان حواليك ناس كتير.. للأسف إحساسك وانت وسط الناس والمفروض إنهم اقرب الناس إليك تلاقيهم مش فاهمينك احساس صعب وبيزيد الوحده والغربه.. ومع ذلك كلنا نفسنا في حد يسمعنا ويفهمنا زي زمان نفسنا في لمة الأهل والاصحاب الجميله اللي بترتاح فيها لصاحب يقبلك زي مانتى بعيوبك ومشاكلك بصدقك اللي جواك بعيد عن الصوره اللي بتحاول تجملها وتظهر بيها امام الآخرين.. وحتى مع الصخب الاعلامى والسوشيال ميديا نحاول نرجع للصح والاصول والعادات والتقاليد اللي بتجمعنا محتاجين تعاملات انسانيه واقعيه بينا  نفضفض ونرتاح مع ناس حقيقيه في حياتنا.. محتاجين نبذل مجهود وندور علي الأساس علي الناس الصح في كل الوشوش اللي حوالينا من غير تجميل ولا مصالح.  محتاجين قلوب تجبر الخاطر وأيد تطبطب وودن تسمع عشان نعيش مع الناس بدل الغربه والوحده اللي احنا فيها.. حفظ الله مصر