عالية ابراهيم تكتب : اسأل نفسك واعرف خباياك

تخيل مدي حلاوة معرفة خبايانا المدفونه جوانا ومدي قوتنا البشريه علي علاقاتنا بنفسنا وبالآخرين في مواقف بتخلينا نطلع الحلو او الوحش اللي جوانا بس مش بنركز فيها لكن لو ركزت هتكتشف ذاتك من جوه وتعرف قد ايه انت عندك مهارات خارقة ومش واخد بالك منها. مش لازم تستنى لما الآخرين يكتشفوك لو رايح تعمل مقابله لشغل ورئيسك قالك انت مناسب في المكان ده.. اعترض وقوله مش مكانى ولا قدرتى انا ممكن ابدع في مكان تانى عشان تكون علامة مميزه في وسط زمايلك ولأنك انت مش اله اي حد يقودها وخلاص من الأفضل انك تبحث عن عمل يحتاج لافكار ابداعيه في مجال بعيد عن شهادتك حاول تعرف مفاتيح قوتك وضعفك وتعرف تتعامل معاها ازاي في واحد عنده القدره يشتغل في وسط مجموعه ويكمل نفسه بالآخرين ويبدع وفِي واحد ممكن يكون فكري ومحتاج تركيز وتفكير ويحتاج للهدوه والعمل لوحده وممكن يبدع وفِي واحد ممكن يكون دخل المجال غصب عنه ومشي فيه بس للأسف مات من جواه الطموح لازم نعرف احنا مين وعايزين ايه من نفسنا عشان نكون راضيين عن افعالنا انا عن نفسي جربت ادخل جوايا واكتشف شخصيتى لقتنى قويه وجباره وقادره اتخطي صعاب كتير وطبعا بمساعده ومسانده من الآخرين لانى اعشق العمل الجماعي بل والأكثر انى اكتشفت بداخلي انسانه مجتمعيه اهتم بمشاكل الآخرين جدا واضع نفسي مكانهم واحدثهم بنفس أسلوبي وعاطفتى تغلب عليا في حل مشاكلهم واعيش حالتهم وكثيرا ما اسأل نفسي ازاي بقدر استوعب طرفين المشكله وبصدق وأتعاطف مع الاتنين. يا تري انا بجاملهم او بكدب عليهم لا اكتشفت ان شخصيتى تقدر تستوعبهم وتطلع الحلو اللي جواهم وأقرب المسافات بينهم واحنن قلوبهم علي بعض وأساعد عقولهم عشان يفهموا بعض صح وهنا بتهون المشاكل والكوارث اللي بينهم ويتعاملوا معاها ببساطه. الحمدلله انى اكتشفت نفسي بس اللي حواليا اكتشفونى أسرع لما كنت بلاقي المشكله توصل لحد عندي كنت بستغرب قوووووى اشمعنا انا ولما اخلص المشكله اعرف انى عندي قدره جوايا ولازم استغلها صح وده بينعكس عليهم ويدهم طاقه ايجابيه يكتشفوا الخير والرحمه اللي جواهم. وعلي فكره اكيد في وسط كل مجموعه او اصحاب او أهل في حد بيعتبر عامل مساعد ليك يظبط نفسيتك ويقويك ويخليك تكتشف نفسك وتبدع في مجالك بدل ما تعيش عمرك كله في نمط روتيني ممل ويزهق وينتهي العمر من غير ما تكون عملت حاجه لنفسك ولمجتمعك. مش عيب انك تسال اللي بيحبوك انت شايفنى ازاي لان ممكن نظرته واكتشافه ليك تكون نقطة تغيير في حياتك للافضل او رضا عن نفسك بعد جري مشوار طويل ساعتها تحس بالراحة وكمان تجدد طاقتك وتكمل حياتك مش عيب انك تكتشف انك غلط وتصلح من نفسك تخيل كده كم التعديل اللي هتعمله في حياتك بعد ما تكتشف نقاط ضعفك وقوتك وتستغلها صح وأنك توظف نفسك لخدمة نفسك وللاخرين كمان علي فكره حلو قوي انك تعلي اللي قدامك وهو يعليك حلو قوى ان يكون لينا مساحة ننور بصيرة اللي معانا وهما ينور بصيرتنا أتمنى نكتشف ألقوه اللي جوانا ونبدأ من جديد حفظ الله مصر