عالية أبراهيم تكتب : وقف الزمن!

ياتري ايه اللي ممكن يحصل لو وقفت الزمن لحظه ورجعت للماضي وبصيت علي حياتك وحسيت بكل حاجه فيها اعمل خريطه لمستقبلك بعد ما تخطيت المرحلة وشوف ممكن تعمل ايه لنفسك غير اللي ربنا عمله معاك وبدون خطط ولا جهد منك بس هى مقدره من الله وتوكل عليه ورضا بكل شيء وأنك ترمى حمولك علي الله عشان امبارح بتاعك وانت عشته والنهارده بتاعك وانت عايشه فعلا لكن بكره علي الله لو صحيت الصبح وبصيت علي حياتك اللي فاتت ولقيت فيها اخطاء دي مش نهاية الحياه... حس انك عايش وممكن تصلح الأخطاء دي لأنك خضت تجارب تخليك قادر علي الإصلاح حاول تدي فرصه تانيه لنفسك ولغيرك لان حياتك اللي فاتت كلها تجارب واقعيه واكيد استفدت منها في اللحظه دي وانت بتحاول تعيد اكتشاف نفسك وقدراتك في حاجات بنمر بيها في حياتنا بتسبب جرح وذكريات مؤلمه لازم تعديها عشان تكمل حياتك لانها أقدار وملناش يد فيها زي المرض والموت والحوادث كلها بقضاء الله وقدره لكن نصبر ونحمد ربنا علي حاجه... وفِي احساس تانى لو رجع بيك الزمن ممكن تختار نفس حياتك وبكل ما فيها وراضي مش معنى كده انها حياه مثاليه من غير اخطاء ولا دوربات في حياتك لكن هو مقياس لكم الحلو والوحش اللي عيشته لان الحياه باكيدج علي بعضه فيها الحلو والوحش عشان تحس بيها اكتر بس المهم تخرج مستفيد وراضي علي حاجه الناس دي حلوه قوي ومتصالحه مع نفسها ومع غيرها وفِي ناس لو رجع الزمان بيها عايزين يتخلصوا من حياتهم تماما ومن كل ذكرياتهم ويعمل عكس كل حاجه في حياته عنده احساس ان كل شيء أتفرض عليه او اختار غلط بس برضوا مش مشكله انت عندك فرصه تانيه في حياتك اخرج من سجن الالم اللي عايش فيه وابتدي حياه جديده حاول تحقق فيها أحلامك لو مشروعه من غير ما تأذي نفسك او غيرك... ساعات القدر بيمشينا في طريق مش من اختيارنا والظروف بتكون أقوي مننا والتوقيت مش في صالحنا المهم نحاول طالما عايشين ونرضي علي حياتنا لان اكيد ربنا له حكمه في كل حاجه  خلينا نتفاءل ونبتسم وناخد كل حاجه برضا ونحمد ربنا علي الحلو وندعي ربنا يبعد عننا الوحش ان شاء الله                                 حفظ الله مصر