يافرحة رمضان
✍🏻بقلم د أمانى موسى رمضان لما بييجي، كأنه نسمة دافية بتمس قلبك. لحظة ما بنشوف القمر، كل شيء حواليك بيختلف… الشوارع، البيوت، وحتى نفسنا. فيه شعور غريب بيخلينا نحس بالهدوء والسكينة، كأن الدنيا كلها وقفت لحظة عشان نستعد للخير.اللمة حوالين الفطار والسحور...
✍🏻بقلم د أمانى موسى
رمضان لما بييجي، كأنه نسمة دافية بتمس قلبك. لحظة ما بنشوف القمر، كل شيء حواليك بيختلف… الشوارع، البيوت، وحتى نفسنا. فيه شعور غريب بيخلينا نحس بالهدوء والسكينة، كأن الدنيا كلها وقفت لحظة عشان نستعد للخير.
اللمة حوالين الفطار والسحور مش مجرد أكل، دي ضحكات وذكريات، أحضان، وأوقات بنحس فيها بالحب والراحة. ريحة الكنافة والقطايف، صوت الآذان وقت المغرب، حتى صوت الناس وهم بيقولوا "رمضان كريم"… كل حاجة بتلمس القلب وتفرحه.
وفي رمضان، قلبك بيتسع… للعبادة، للصلاة، للصدقة، للكلمة الطيبة اللي ممكن تغيّر يوم حد. حتى لو يومك كان تعب، رمضان بيخليك تحس إن في فرصة جديدة تبدأ بيها، فرصة للتقرب من ربنا، ولتغيير نفسك للأحسن.
رمضان مش بس شهر، رمضان إحساس… إحساس بالفرحة اللي من جوه، بالطمأنينة اللي بتملا القلب، وبالأمل اللي بيخلي كل حاجة حواليك أحلى. لما الشهر يجي، بتحس إن الدنيا كلها مليانة نور… نور بيغطي على كل همومنا، وبيخلينا نبتسم من قلبنا.
