وداعا ضمير الفن .. وداعا وحيد حامد

*بقلم: الإعلامية مريم يعقوب* فقد الفن اليوم قلم من أهم الأقلام إللى ابدعت للسينما المصرية وللمشاهد المصرى والعربى لسنوات طويلة وخاطبت الضمائر والعقول والقلوب بأجمل الاعمال السينمائية والدرامية مش كده وبس دى رسمتها بريشة فنان متميز ومبدع كبير بمنتهى الصدق علشان تجسدها لينا بأروع الفنانين ..قلم تربع على عرش الفن بأصدق واقوى العبارات والجمل اللى بيتغنى بيها وبيرددها كتير منا لحد انهاردة .. لانه كان كيان عشنا فيه ومعاه مع كل شخصية قدمها لينا ولمست قلوبنا وعقولنا.. كيان إسمه الكاتب والسيناريست المبدع وحيد حامد.. اللى ميعرفش ان الفن ليه ضمير يبقى عمره ما شاف فيلم واحد من افلام وحيد حامد او حتى سمع جملة كتبها قلمه اتقالت على لسان فنان وهزت الوجدان وشكلت الافكار وخطفت المشاعر معاها ودى بالظبط الحاله اللى أنا واغلب جيلى عاشها مع ضمير وحيد حامد ضمير مصرى زى ما الكتاب بيقول واللى اصبح مع الوقت جزء لا يتجزأ من ضمير الفن المصرى.. أحيانا بنسمع اخبار تألمنا تصدمنا تستوقفنا والاهم انها بتخلينا نسترجع ونتأمل شريط طويل من الذكريات والمواقف والعبارات إللى اثرت فينا وتركت بصمة كبيرة جوانا ف نلاقى نفسنا روحنا معاها فى رحلة من المشاهد اللى بتفكرنا بواقع عشناه وحسينا بيه وده كان حالى اول ماسمعت خبر وفاة وحيد حامد ويبدأ الشريط يشتغل وتشتغل معاه الأفلام والسيناريو عقلك يسترجعه وودنك تسمع عادل امام ف فيلم الإرهاب والكباب وتعرف ان (حاجات كتير هترخص..هتبقى بسعر التراب أنا وأنت والاستاذ وحضراتكم اجمعين)..تبقى انت اكيد قدام ضمير الفن بعدها تفتكر فيلم اضحك الصورة تطلع حلوة وتفهم ان (العقد مبيعملش الحقيقة.. العقد بيثبتها بس.. كلمة بحبك عقد..اللمسة عقد..النظرة عقد) تبقى انت بتتكلم عن ضمير الفن وفجأة الشريط ياخدك لطيور الظلام وتتأكد ان (مفيش صداقة ابدا مع خصومة،اتنين ديابة لايمكن يعيشوا مع بعض فى قفص واحد) وهووووب عقلك يوديك للغول فتلاقى ان (لما الناس بتموت الحياه بتستمر بس لما الناس بتبعد الحياه بتقف) تبقى اكيد سامع ضمير الفن.. متعايش معاه ومتعايش معاك.. حاسس بيك بيعبر عنك بتشوف شخصيات قدامك من جواك انت عارفها كويس لأنها منك..هو ده اللى صنعه وحيد حامد.. فى عام 1996 قدر وحيد يخلى كل المشاهدين ف دور العرض السينمائى وقت عرض فيلم النوم فى العسل يخرجوا من السينما وهما بعلووو صوتهم يقولوا ف نفس واااااحد كلمة تعبر عن إللى جواهم وينطقوا بيها ف مشهد لمس قلوبنا كلنا وابدع فيه الفنان العبقرى عادل امام وهى كلمة ااااااااه اللى خرجت من قلوب ولسان الناس بمنتهى المصداقية.. ده ملوش مسمى غير انه قلب نبض بضمير وكلمة اتكتبت على ورق وجسدها فنان وصدقها مشاهد..ده اللى عمله وحيد حامد وكأنه كان متوحد ف كل ضمير وقلب كان بيتفرج عالفيلم قدم لينا عشرات الأفلام اللي تصدى من خلالها لقضايا اجتماعية وسياسية شائكة، وده كان سبب لاستدراجه لساحات المحاكم مرات كتير بسبب قضايا أقيمت لوقف عرض أعماله السينمائية ومن أشهر أفلامه "طائر الليل الحزين"، و"آخر الرجال المحترمين"، و"التخشيبة"، و"البريء"، و"أنا وأنت وساعات السفر"، و"الدنيا على جناح يمامة"، و"الراقصة والسياسي"، و"المساطيل"، و"اضحك الصورة تطلع حلوة"، و"سوق المتعة"، و"معالي الوزير"، و"دم الغزال"، و"احكي يا شهرزاد". وتعاون حامد مع أبرز نجوم السينما المصرية في أكثر من جيل، وعلى رأسهم فنانين وفنانات كتير أمثال سعاد حسني في فيلم "غريب في بيتي"، وميرفت أمين في فيلم "الدنيا على جناح يمامة" ومديحة كامل في فيلم "ملف في الآداب". وشكل ثنائي سينمائي مع عادل إمام اللى قدر من خلاله يظهر الوجه الآخر للممثل المشهور بأدواره الكوميدية زى فيلم "الهلفوت"، و"الإنسان يعيش مرة واحدة"، و"الغول"، و"اللعب مع الكبار"، و"الإرهاب والكباب" و"طيور الظلام"، و"النوم في العسل" وقدم على مدى مشواره كتير من المسلسلات التلفزيونية، منها "أحلام الفتى الطائر"، و"البشاير"، و"سفر الأحلام"، و"العائلة"، و"الدم والنار"، و"أوان الورد"، و"بدون ذكر أسماء"، واخيرا الجماعة". إنما عن الجوائز اللى حصدها.. حصل على جائزة النيل في الفنون عام 2012، وكرمته مهرجانات كتير منها مهرجان دبي السينمائي في 2017، وآخرها مهرجان القاهرة السينمائي الدولي في 2020 واللى قال فيه كلمة معبره ومؤثرة ابكت الحاضرين من النجوم والفنانين وكأنهم كانوا بيودعوه ف اللقاء الاخير ليه رحل وحيد حامد عن عالمنا صباح اليوم ولكنه ترك لينا كلماته واعماله تخلدها ليه ذاكرتنا وقلوبنا وضمائرنا قبل ان تخلدها ليه ذاكرة السينما المصرية وداعا ضمير الفن وداعا وحيد حامد