نبدل الأدوار

بقلم/ هانى آدم ما تيجو نبدل الأدوار و لو ساعه عشان نفهم و نتصور مشاعر الناس حسب ترتيبهم الجمله بدل فاعل تكون مفعول بدل جانى تكون مظلوم بدل مجروح تكون جارح بدل محبوس تكون سجان و مين عالم ما يمكن لما نستبدل فى أسامينا و أولادنا و أهالينا نلاقى حل للفزوره و نفسر معادلتها فى بيتها قصيدتى بكر مضفره الأشعار و طار من عينها نومها عشان عيال أيتام يمام غزل السلام أحلام فى أرض إحتلها ولادها معادها الثوره لسه ما جاش أنا يا دوب حلم بيجهز هدوم العيد فى ليل رمضان لا عارف أتوضى و لا حافظ من القرآن حاجه تكفينى فى الغربه و تكسر عطشى بعد ما نشفوا ريقى طريقى مبهم ملان سكاكين زنازين عشق للعشاق و ترسانة فراق للمشتاقين ضمه يا غمه فرشتى كحلك فوق شموس روحى و بوحى ما عادش قادر بوح تروح الفكره و تعسكر مكانها جروح و رغبه فى لعبة الأقدار ما تيجو نبدل الأدوار أنا كشاعر هأقص لسانى و أستناكوا يالقراء تقولوا إحساسى زى ما ياما جدفت بمراكبكم و بكره هأروح لدكتور صاحبى و ألبس أحلى سماعه أشوف ماله و إيه واجعه دوايا أكيد هيلبقله مجرد شقلبة صوره هتخلق فى العقول أفكار تحرك صمت ناس إتعودوا و ملوا و تخلق حاله من إبداع تدق الزار تكز نهار ما تيجو نبدل الأدوار