ما هو «الظفر الغائر»»

يعنى بدل ما الظفر بينموا للامام فى الهوا ودا الوضع الطبيعى لأ بينموا جوة اللحم لا مش بس كده دا كمان بيدخل معاه ميكروب ويسكن جوة فى الحتة اللى نما فيها جوة اللحم ويعمل التهاب مزمن وما بيروحش لان دى بيئة رائعة بالنسبة للميكروب عشان كده استخدام المضادات الحيوية سواء عن طريق الفم او مراهم موضعية بتريح العيان فترة مؤقتة وبيرجع الالم والمعاناه تانى

««اسبابه»» نركز شوية وحياة ابوكم فى الاسباب لانه بييجى بسبب غلطة بسيطة فى قص الاظافر الناس فاكرة انه من النظافة اننا نقص الظفر للاخر لحد ما نجيب اللحم ماشي دا ممكن يمشي فى اى ظافر الا فى ظفر القدم الكبير ! ليه بقا ؟؟؟ -عشان طبيعة الظفر ده غير اى ظفر تانى سواء فى القدم او اليد ... ايوه هو ربنا خلقة كده عريض والاطراف بتاعته اقصر من منتصفه .. يعنى لو قصيته لحد اللحم قبل ما ينمو الظفر هينموا اللحم فوقه خصوصا من الاجناب ولو سيادتك لابس شوز ضيق بقا هتضغط اللحم فوق الظافر اكتر خصوصا لو لابسه لفترة طويلة ايه اللى هيحصل بعد كده ؟؟؟ هييجى الظفر يطول عادى هيدخل جوة اللحم .. ودى المرحلة الاولى اللى هتبدء تحس بيها بالمشكلة ودى علاجها بسيط هنقولة فى الاخر.. حضرتك طنشت وما عالجتش هتدخل على المرحلة التانية .. اللى هى انه هيدخل ميكروب مع الظفر ويعمل التهاب مزمن .. ودا حله جراحى فقط طيب نقدر من اسبابه نستنبط طرق الوقايه -طبعا -اولا لما حضرتك تيجى تقص ضوافرك يا اما تقصها بشكل افقى يعنى على خط واحد يا اما تخلى الجناب اطول من المنتصق .. وكمان ما تجيبهاش للاخر .. خلى حوالى مللى او 2 مللى عشان اللحم ما يغطيش عليها -ثانيا .. نلبس شوز مقاسه مناسب للقدم بلاش تلبس بتاع ابنك اللى فى ابتدائى خصوصا لو حسيت بالم فى صباعك من الجنب

««العلاج»»

اولا ... علاج تحفظي ودا بينفع للمرحلة الاولى .. قبل ما يحصل الالتهاب ودا بيتعمل ازاى .. حضرتك او الطبيب المعالج بيرفع الجزء الحاد من الظفر اللى ناوى يدخل فى اللحم وندخل تحته حته قطنه متعاصة بيتادين او حتة من خيط تنظيف الاسنان ونغيرها كل يوم لحد ما الظفر ينمو لقدام ويسيب اللحم فى حاله طب لو رفع الجزء دا صعب عشان ندخل حاجة تحته ؟؟! حضرتك هتيجى فى نص الظافر وتشيل طبقات رقيقة منه باستخدام مشرط جراحى وبحرص وياريت الطبيب اللى يعمل الحركة دى عشان يضعف الظفر من النص ويبقى سهل ترفعة من الاطراف ثانيا .... الجراحة التدخل الجراحى بيبقى فى حالة الالتهاب الشديد جدا و تلاقى الصباع وارم وبيطلع صديد .. وفى الحالة دى بنشيل الظفر كله عشان الالتهاب يروح .. وفعلا الالتهاب بيروح بسرعة بس لما الظفر بينموا تانى بترجع المشكلة تانى طيب التدخل الجراحى السليم بيبقى امتى ؟؟؟ لما يكون الظفر عامل التهاب مزمن وشكله زى اللى فى الصورة اللى تحت وهى جراحة بسيطة باستخدام بنج موضعى بنشيل الجزء اللى عامل مشكلة وبيبقى حوالى 2 مللى من الظفر ونشيل معاه الانسجة الملتهبة واهم حاجة عشان ما يرجعش تانى بنشيل الجزء اللى بيطلع منه الحته دى من الظفر وهى اسمها germinal matrix وفى ناس بتقول عليها الهلال الابيض .. دى موجودة ورا قرب مفصل العقلة الاولى ودى لو ما اتشالتش هيرجع الظفر الغائر تانى اخر حاجة امتى نعمل غرز للجرح وامتى ما نعملش -ما نعملش لو الالتهاب شديد بنشيل الانسجة الملتهبة ونسيبه يطلع انسجة جديدة -ونعمل غرز مش مشدودة اوى او الالتهاب خفيف عشان ما يحصلش نزيف