حبكيات ... ( إوعااااك يا صلاح )

إوعاااااااك يا صلاح تبُص وَرَاك أو تدخل في عُراك بتوع ( الجبلايه ) قرود مهما ح يتنططوا أو ح يخططوا مش ح يأثروا فيك إذا كان جوَّاك أو برَّاك علشاااااان إنت صلاح الناس ب تحبك دون ما بيآخدوا قرار من تحت القُبه علشان إنت فردت لسان أفرنجي ف أصبح يهتف ( هيلا وهوبا ) علشان إنت رفعت علمنا في قلب أوروبا إوعاااااااك يا صلاح تتأثر بالقنوات والمانشتات والرجاله الستات والستات السبعات واللي يحلِّلوا واللي يضلِّلوا واللي يناموا علي العتبات إوعااااااك يا صلاح م التكتيفه ومن الناس الهتِّيفه ومن الناس اللي ما تسوى في سوق ( الكوره ) التعريفه وفي فَرْق من اللي بتنصِفه( فيفي ) وفي فَرْق من اللي بترفع قَدْرُه ( الفيفا ) إوعااااااااك يا صلاح م ( الشِلَّه ) ومن الناس اللي تبيع ضمايرها ب ( إلا ) ومن الناس اللي في قلبها حِقد و ( عِلَّه ) ومن الناس اللي لا لاحقين غطا أو ينفعوا ( حلَّه ) إوعاااااااك يا صلاح إنت اللي مزجت جميع الألوان وإنت اللي رسمت الحلم لكل الفُقرا وفرَّقت العنوان وإنت الفرحه اللي بجد في عِز الأحزان وإنت الضحكه الصافيه اللي بتدخل قلبنا دون إستئذان إوعاااااااك يا صلاح تزعل م ( المدعو ) الجماهير راح تفضل تدعو تدعو تدعو بإن تحقق حلمك والجبلايه بكل قرودها ح يبنوا مكانها ( حديقة حيوان ) ________________ محمود الحبكى