إمتى أشتري اللحمة من الجزار.... الصبح ولا ٱخر النهار ؟

الدكتور أحمد حمدي الشبح بنلاحظ كلنا إن الجزارين بتكون زحمة الصبح لأن معظم الناس بتفكر تشتري اللحمة طازة وهي لسه جاية من المدبح كمان في مجتمعنا الريفي الناس بتقف على راس الدبيحة بمجرد الجزار مايخلص دبح ويعلقها تبدأ الزباين تاخد منها وممكن الدبيحة ماتكملش ساعتين وتكون خلصت ده حتى إحنا كمستهلكين بنقيس شطارة الجزار بسرعة بيعه للحمة بمجرد ما يعلقها في المحل طب تفتكروا ده صح ؟ وهل إن أنا أشتري اللحمة وهي سخنة طازة لسه واصلة من المجزر ولا أخلص شغلي وأرجع أشتري اللحمة في ٱخر اليوم وأنا مروح ؟ هقولك أنا بقى الصح طبعاً هو إن أشتري اللحمة ٱخر اليوم خالص ماتستغريش هفهمك أكيد كلنا سمعنا عن مصطلح ( تشميع اللحمة) وبالمعنى العلمي ( التيبس الرمي regor mortis) وده معناه إن نسيج اللحمة لازم ياخد وقته علشان يكون اللاكتيك أسيد من بعد الدبح وده بياخد وقت ع الأقل ٦ ساعات ودي مادة بتحفظ اللحمة وتغلفها وتحميها من الميكروبات وبالتالي فرص فسادها مع الوقت هتكون ضعيفة جدآ وكمان اللاكتك اسيد بيدي المرونة والطعم المستساغ الجميل للحمة يعني من الٱخر كده علمياً المفروض استنى على اللحمة ما أقطعهاش من بعد الدبح كام ساعة كده علشان حفظها يبقى سليم وصحي وكمان طعمها يكون طيب ومستساغ اممممممممم واحد كده حس إن الكلام علمي وكلام كتب ومش عاجبه هقوله تعالى نتكلم بلغة التجارة والشرا والبيع الجزار دايما ف بداية بيعه بيكون عايز يخلص من الاجزاء اللي فيها دهون لانها اسرع حاجة بتبوظ لو اللحمة فضلت متعلقة عنده ف المحل لوقت طويل وده معناه إنك لو روحت عند الجزار ف اول اليوم لازم هيلبسك ف قطعية فيها دهون ولذلك لو الجزار عايز يخدمك هيقولك عدي عليا كمان شوية تكون ( اللحمة كشفت) حاجة تانية كمان طبعاً حضراتكم عارفين إن الجزار بيستخدم كميات كبيرة من المياه اثناء الدبح والسلخ والتشفية والمياه دي بتتخزن جوه نسيج اللحمة وبتكون من ضمن الوزن لكن مع الوقت واللحمة متعلقة المياه دي بتكون اتصفت بنسبة كبيرة وهتاخد وزن حقيقي أنا عن نفسي هشتري اللحمة آخر اليوم خالص اعتقد بقى لو لفت نظرك لمعلومة جديدة يبقى متنسانيش في دعوة يوم الجمعة المبارك ولك بالمثل إن شاء الله