أمي الغالية

ساجدة خليل كل ما امسك القلم عشان اكتب عنك يا ست الكل يعجز القلم والقلب والعقل صياغة كلمات تفي بحقك كل اللي اقدر اقوله انك احلي مافي حياتي شكلي شكلك روحي من روحك أعرف أنني مقصرة كتيرا في حقك واني مهما عملت مش هوافي حقك.أمي الحنونة بلاقي في كل همسة من حياتي بصمة واضحة ليكي ودا من أول ما ببدأ يومي وانشغل بتحضير مطالبات اولادى لحد نهاية اليوم بيبان عليا اني متأثرة جدا بكل خطوة كنتي بتعمليها معي أنا وأخواتي وانتي بتربينا وترعاينا وتحنوا علينا . حتي لما بكون في شغلي وتحطني كلمات التقدير والاحترام بقول دى تربية أمي وأبي ليا ولولا رعايتك واهتمامك بدراستي ومستقبلي مكنتش قاعدة في المكان ده . حتي وانا في حياتي الزوجية وبتمر علينا اوقات حلوة ومرة وبلاقي زوجى يقول انتي بنت اصول من جوايا بقولها بكل فخر اني تربيتك وايامنا بتمر بينا بسلام بفضل دعواتك انتي وابي ماما : كتير بتذكر اوقاتي معكي واد ايه تعبك معي في طفولتي ومراهقتي وشبابي ولحد الان وانا ام ولما بحكي عن متاعب الأمومة تضحكي وتقولي انتوا عمركم ما تعبتوني ياه اد ايه انتي حنينة وجميلة بعشق اهتمامك ورعايتك اللي أزال يحيط بنا أنا وأخواتي واحفادك واللي بيبان وبشدة لما نجمع عندك في لقائنا الاسبوعي وانتي بتحاولي رغم تعبك انك تجمعينا بحسك واحساسك وتبقي نفسك تجيبي حتة من السماء لينا البيت بيكون منور بيكي وبيشع حب وحنان واهتمام برعايتك لينا ..بجد انتي احلي حاجة في حياتنا ماما كل سنة ودقيقة وثانية في عمرك وانتي طيبة ويارب يدوم عليكم الصحة والعافية والرحمة انتي وابي العزيز الغالي