رمضان واللمة الحلوة

✍🏻بقلم د.امانى موسى

رمضان مش مجرد شهر فى السنة…
رمضان حالة.
حالة بتحصل جوانا قبل ما تحصل حوالينا.
أول ما الهلال يظهر…
كأن القلب بياخد نفس جديد.
الروح تهدى…
والدنيا، مهما كانت زحمة، تبطّأ شوية.
رمضان بييجى ومعاه دفء غريب…
دفء البيوت وهى منوّرة،
دفء المطبخ وهو مليان ريحة أكل وحب،
دفء أم بتنادى على ولادها قبل الأذان بلحظات.
اللحظة اللى الكل فيها مستنى صوت الأذان…
ساكتين…
رافعين إيدينا بالدعاء…
وبعد أول تمرة…
نحس إننا مش بس فطرنا…
نحس إننا اتجمعنا.
اللمة فى رمضان مش صدفة.
دى احتياج نفسى عميق جوانا.
إحنا كبشر محتاجين نحس إن لينا مكان ثابت.
إن فى كرسي مستنينا.
إن فى حد مستنينا نقعد جنبه.
الإحساس ده اسمه أمان نفسى.
ولما بنقعد حوالين سفرة واحدة…
التوتر بيهدى…
القلب يطمن…
والعقل ياخد استراحة من صراعات السنة كلها.
يمكن عشان بنفتكر إننا مش لوحدنا.
فى أيام كتير بنرجع بيوتنا وإحنا مرهقين…
شايلين ضغوط شغل…
مسؤوليات…
تعب نفسى…
لكن فى رمضان، القعدة دى بتبقى علاج.
ضحكة صغيرة من طفل ماسك فانوس…
سؤال بسيط: يومك كان عامل إيه؟
إيد بتتحط على كتفك…
كلها حاجات بسيطة…
بس تأثيرها النفسى عميق جدًا.
رمضان بيرجع لنا إحساس الانتماء.
إننا جزء من حاجة أكبر من نفسنا.
إن لينا جذور…
ولينا ناس.
حتى اللى بينه وبين حد زعل…
رمضان بيكسر الحواجز.
بيخلى القلوب ألين.
الكلمة أسهل.
والاعتذار أخف.
عشان كده رمضان مش بس شهر عبادة…
ده شهر ترميم نفسى.
بيرمم العلاقات اللى شرخت.
بيرمم مشاعر اتجمّدت.
بيرمم إحساس كان بيضيع وسط زحمة الحياة.
بس خلينى أسألكم…
هل بنعيش اللمة بجد؟
ولا قاعدين جنب بعض وكل واحد فى عالمه؟
اللمة مش عدد كراسى حوالين السفرة…
اللمة روح.
والبيت مش حيطة وسقف…
البيت إحساس إن فى حد شايفك… سامعك… حاسس بيك.

عايزة أقولكم حاجة من القلب بصدق…
إحنا مش بنخاف من الوحدة عشان مفيش ناس حوالينا…
إحنا بنخاف من اللحظة اللى يبقى حوالينا ناس…
ومع ذلك نحس إننا لوحدنا.
رمضان فرصة.
والفرص مش دايمًا بتيجى تانى.
يمكن رمضان ده يبقى آخر فرصة تصلّح علاقة بايظة…
آخر فرصة تقول لحد أنا مقدرك
آخر فرصة تحضن حد قبل ما الأيام تاخده منك.
محدش فينا ضامن مين هيقعد معاه على نفس السفرة السنة الجاية.
فلو عندك حد مستني كلمة…
قولها.
لو عندك حد بينك وبينه مسافة…
قرب.
لو عندك قلب زعلان منك…
طيب خاطره.
رمضان مش بس شهر بنصوم فيه عن الأكل…
رمضان شهر نصوم فيه عن القسوة…
عن العند…
عن البرود.
متستناش الكرسى يفضى…
عشان تفتكر مين كان قاعد عليه.

رمضان كريم…
ويا رب دايمًا يجمعنا على خير…
قبل ما يفرقنا الوقت من غير استئذان.