معتز الدمرداش : كريمة مختار مزعلتش مني ولا مرة في حياتي

كتبت: ريما أحمد كان كل عيد ام كل البرامج بتتسابق و تتخانق عشان تستضيف الفنانة الراحلة كريمة مختار و خصوصا بعد مسلسل حمادة عزو ... انت بقا طبعا كنت بتحط رجل على رجل عشان ضامن الضيف؟ = لا خالص... انا قولتلها اني عارف انه جاي لك عروض كتير من قنوات كتير و انا كنت لسه بادئ في برنامج تسعين دقيقه و كان لسه برنامج صغير علي قده و مع ان كان عليها ضغوط كتير و عروض مادية مغرية جدا من برامج تانية كتير عايزة تستضفها ومع ذلك لما طلبت منها تكون ضيفتي فالبرنامج قالت لي عمري ما اتأخر عنك ابدا ... و قالت لهم لا عشاني و بالمناسبة و هي في أواخر أيامها كنا عاملين لها تلفزيون في أوضة نومها لأنها كانت حريصة تشوف البرنامج بتاعي كل يوم و توجه لي ملاحظاتها القيمة .. كنت خايف اوي انها تموت و هي زعلانة مني لأي سبب .. و كنت عايز أعرف أنا نجحت في الامتحان ده و لا لأ .. ( قصده امتحان الابن البار ) فا روحت لها و هي ساعتها كانت تعبانة و كلامها قليل اوي و سألتها انتي زعلانة مني ؟؟؟ شاورت لي براسها إنه لأ .. قولتلها أكيد ؟؟؟ شاورت لي تاني لأ .. مقدرش أوصف لك كمية الراحة النفسية الرهيبة أوي اللي حسيتها لما أخدت الشهادة دي ... شهادة إن امي مش زعلانة مني .