شيرين مرسي تكتب: حاسب قبل ما تناسب

لو قررت تتجوز لازم تعرف ان الجواز ده شيء مش سهل ابدااااا سيبك من الحب والارتياح والاعجاب والشعارات دي ،،،، كل ده كلام جميل ولابد منه ، بس الأهم من كل ده انت هتناسب مين ؟؟؟ النسب في الجواز مهم جدا جدا ، الوراثة والمحيط والمجتمع والبيئة من العوامل الاساسية المؤثرة في تكوين شخصية الانسان وبنيته الفكرية والنفسية البيت اللي انت هتدخله والناس اللي هتحط ايدك في ايدهم وهتربط اسمك باسمهم وهيبقوا جدود واخوال اولادك لازم تختارهم بعناية وتدرس الموضوع الف مره قبل ما تقدم عليه افتكر حديث النبي عليه الصلاة والسلام {اختاروا لنطفكم فان العرق دساس} متقولش اصل البنت كويسه وانا وهي اللي هنعيش سوا واهلنا ملهمش دعوة بينا ووووو،،،،، كل ده كلام فاضي الجواز يعني تكافؤ بين الزوجين عشان الحياة بينكم تنجح وتستمر هادية ومستقرة دور على اهل محترمين وعيلة تتشرف بيها قدام الناس وقدام اولادك ، ورجاله عاقلة تشرفك وترجعلهم لو حصل بينك وبين مراتك مشكلة مستحيل تلاقي بنت اتربت في بيت وفي بيئة معينة الا لما تكون شربت واتأثرت بظروف البيت والبيئة اللي نشأت فيها ، ومستحيل تفصل طباعها عن طباع اهلها ولا هتعرف تغير اللي هي نشئت وكبرت عليه ، مهما اظهرتلك من مشاعر حب او محاولات منها للتغير علشانك ، هتلاقيها بعد فترة بتحن لاهلها او بترجع تاني للطباع اللي اتربت ونشئت عليها فكر في المشكلة الاكبر وهي تربية اولادك .... الأم هي اللي بتربي .... اطفالك بيكبروا في حضنها وبيتأثروا بطبعها اكتر منك ويا سلام لو كانت طبيعة شغلك فيها سفر كتير او عدم تواجدك مع اولادك باستمرار ،،،، طبيعي هتلاقي اولادك نسخه من مراتك واللي هي نسخه من اهلها ، يعني ذي ما قال سيد الخلق العرق دساس ،،،، الجواز شيء مش سهل واختيار الزوجة لازم يخضع للتفكير بالعقل قبل القلب بنت العيلة اللي اصلها طيب هتلاقيها هتحبك وهتحتويك وهتخاف على زعلك وهتعاملك ذي ما شافت امها بتعامل ابوها هتلاقيها في وقت الفرح ووقت الشدة مخلصه تقف جنبك وتسندك ومش هتعايرك ولا هتتغير عليك مهما جار عليك الزمن ، ولا هتمن عليك بوقوفها جنبك لو ربنا فتح عليك اوعى تنجرف ورا شكل جميل او كلام معسول او مشاعر زائفة وتتسرع وتتجوز اي بنت مش مناسبه ليك ، حاسب قبل ما تناسب .... ومتقلقش لو كنت حبيت بنت وكانت عيلتها او وضعها الاجتماعي او بيئتها او مادياتها مش مناسبه ليك ربنا بيبعت لكل انسان المناسب له وهيرزقها بالمتكافيء معاها واللي يناسب وضعها وظروفها متورطش نفسك توريطة ملهاش حل ، لانك لو ندمت وفكرت تصلح غلطك ده هيبقى تمنه غالي اوي وهتبقى الخساره كبيرة ، والابناء اللي بيدفعوا التمن ،،،،، للأسف الكلام ده ينطبق على الستات والرجالة