سهير البابلي أخر ثلاثي نجوم ريا وسكينه

شادية لما جالها حسين كمال بمسرحية ريا وسكينة وقالها:- " المسرحية بطولتك انتي وسهير البابلي وعبدالمنعم مدبولي" قالتله :- " المسرحية بالأساس مسرحية كوميدية وانا عمري ما مثلت كوميديا علي المسرح ودول أساتذة كبار في المسرح فأنا هعمل معاهم إيه". قالها:- "متخافيش هما هيساعدوكي" فلما راح لعبدالمنعم مدبولي وسهير البابلي وقالهم أن الست شادية وافقت أنها تكون معاكم في المسرحية فقالوله:- " الست شادية كاريزما كبيرة حتي لو كانت أول مرة تقف علي المسرح وليها هيبتها وجمهورها اللي هيجي مخصوص عشان يتفرج على الست شادية كأول مرة ممثلة كوميدي على المسرح". اللي يشوف المسرحية ميحسش أن الست شادية اول مرة تقف على المسرح ولا يحس بفرق كبير بينها وبين سهير البابلي وعبدالمنعم مدبولي والسبب بسيط جداً وصعب جداً والسبب في ده في أنهم هما اللي علموها تقف علي المسرح.. أمتي و إزاي تقول الايفية عشان تضحك الناس.. أمتي تعلي صوتها في الكلام عشان تضحك الناس وامتي تصرخ عشان تبكيهم ولو لاحظت أن معظم مشاهد شادية مع الفنانة سهير البابلي اللي كانت بقالها فوق العشرين سنة ممثلة مسرح يعني تقدر تأكل شادية بسهولة لكن هتلاقيها كانت بتفرش لها الايفية عشان شادية تقوله وده مش بيحصل كتير علي المسرح فكل ممثل عايز يكون احسن ممثل لكن الوضع يختلف مع الأساتذة.