رسالة لحواء

بقلم: د.ياسمين ناجي مدرس مساعد بقسم الصحة النفسية- كلية التربية- جامعة السويس خليكي رقيقة وكيوت في نفسك وكلامك... بنعيش في زمن للأسف بقى كل حاجة بتحصل فيه عادي وطبيعي وفيها إيه يعني ومفيش مشكلة وهيا الدنيا ماشية كده وغيره من الكلام اللي بيتقال وبنسمعه كل يوم ......... يعني لما كل يوم نلاقي بنات وستات للأسف بيقلدوا الشباب والرجالة في إنها تبقى روشة وبنت متفتحة وماشية مع موضة الألفاظ وكل جديد وتقول الألفاظ دي وبصوت عالي وكمان بتضحك، وهيا مش عارفة إنها بتضر نفسها وحياتها بعد كده. هتقولولي هيا كده الأيام دي ودي اللغة إللي الشباب بيتعاملوا بيها، وماله أنا مقلتش حاجة بس لما كل بنت تقول الألفاظ دي وهيا فرحانة وتنزل بوستات عادي كده وتقول الكلام ده ومنتظرة صاحبتها وصحابها الشباب يعملوا لها لايكات وتعليقات وشير، علشان تحس وتعّرف الناس اللي حواليها إنها بنت روشة وماشية مع العصر ومش مقفلة ومتخلفة. لا. على فكرة إنتي تفكيرك غلط، أنا مقلتش تكوني متخلفة أو مقفلة وإنك متعرفيش اللغة اللي للأسف كل يوم بنسمعها لحد ما هنصحى في يوم كده من الأيام ونلاقي لغتنا راحت واختفت مع الزمن. هتقوليلي طيب نعمل إيه هو ده اللي ماشي، هقولك تعملي إيه: اسمعي واعرفي معاني الكلام الغريب ده اللي بيتقال وبتقريه على كل مواقع التواصل الاجتماعي بس بلاش تقوليه بلاش تخليه أساس حياتك في كلامك وفرحك وحزنك وغضبك وشغلك ومع أهلك وأخواتك وصحباتك وصحابك وزمايلك في الشغل وخطيبك وجوزك وأولادك. اعرفيه من باب العلم بالشىء علشان لما يتقال قدامك أو تسمعيه من صحباتك وصحابك أو زمايلك في شغلك أو من خطيبك أو جوزك وهما بيتكلموا مع صحابهم تكوني فاهمة بيقولوا إيه. هتقوليلي طيب ما الشباب والرجالة بيقولوه عادي وبعدين إحنا في زمن مفيش فرق بين البنت/ الست، والولد/ الراجل، هقولك لأ وألف لأ..... هنا فيه فرق عارفة إيه؟ إن الراجل مبيكونش قاعد مع ولاده طول النهار يعني لو فرضنا قعد معاهم ساعة مش هيقول الكلام ده، لكن إنتي أكتر واحدة بتقعدي معاهم إزاي هتربيهم وإنتي الألفاظ دي بقت أساس حياتك، هتقوليلي وماله علشان يكونوا فاهمين كل حاجة، والله طيب لما يروح المدرسة والمدرس/ المدرسة تسمعه بيقول الألفاظ دي هيقولوا إيه عليه....... طيب ليه تخلي ابنك/ بنتك يسمعوا الكلام ويحسوا بإهانة. هتقوليلي طيب ما الولاد بيجوا من المدرسة بيقولوا الألفاظ دي، ماشي أنا معاكي في ده برضه، بس وقتها بقى هتعرفيهم معني اللي بيقولوه وتفهميهم إنه غلط يتقال عارفة ساعتها هيقولوا إيه هيسألوكي إنتي عرفتي الكلام ده منين هتقوليلهم إنك عارفة الكلام ده بس مبتقوليهوش، وقتها هيعملوا زيك لأنك قدوتهم. ده إنتي أساس البيت إللي بتربي وبتنصحي وبتوعي وبتفهمي، ده إنتي ربنا قال في كتابه الكريم «واستوصوا بالنساء خيرا» يعني إزاي والنبي بنوتة وست رقيقة وكيوت وتقول الألفاظ دي!