بروفايل: أنور وجدي من لبيس يوسف وهبي إلى نجم الشباك

كتبه: هاني كمال من غرائب الحكايات ان شاب مصري سوري الأصل اسمه محمد انور يحيى الفتال اشتهر باسم انور وجدي كان مهووس بالهجرة لأمريكا للتمثيل في هوليوود وتفشل محاولاته للسفر فيتجه تفكيره على التمثيل في مصر ولما كانت اكبر فرقة مسرحية في عصرة هى فرقة مسرح رمسيس ليوسف وهبي ففضل ينتظر امام المسرح كل يوم ويحاول يتقرب من يوسف بك اللي وافق نتيجة توسلاته في البداية انه يشغله ( لبيس في الفرقة ) وبعد فتره اسند له دور كومبارس في احد مسرحياته وبدأ يدخل مجال التمثيل اللي كان بيحبه .. وبعد فترة لما يوسف وهبي اتجه للسينما بقوه اخد معاه مجموعه من افراد فرقته كان منهم انور وجدي .. وكان بيخليه دايما يمثل ادوار الشاب الثري الوغد ودي الشخصية اللي اتعرف بيها وفضل يمثلها لحوالي 10 سنين وكان بينافسه فيها وقتها عبد السلام النابلسي في بداياته وفاخر فاخر في شبابه ثم عمر الحريري اللي اشتغل فتره على التيمة دي ... وكانت انور وجدي بيحاول يخرج كل فترة على استحياء من اسر الشخصية دي على استحياء ولكن عشان ملامحه كان دايما المنتجين حاصرينه في شخصية الشاب الثري في اكثر الاحيان ... ولذلك كان بيتقرب من اشهر ريجيسير في الوسط الفني وقتها واسمه قاسم وجدي علشان يرشحه للمنتجين والمخرجين وعشان يفضل في بال قاسم وجدي وبرده عرفانا بجميله سمى نفسه باسمه الى ان جاءت له فرصة اول بطولة سنة 1944 في فيلم كذب في كذب واللي كان بداية انطلاق انور وجدي في عالم النجومية كما لو كانت اصابته شرارة الكاريزما .. فاصبح فاجأة فتى الشاشه واصبح ظاهرة في الافلام السينمائية وايقونة نجاح ... ما ضيعش وقت انور وجدي وقرر انه ينتج لنفسه ولغيره افلام ثم قرر دخول مجال الاخراج ومجال كتابة القصة ونجح فيهم جدا لدرجة انه صنع من قصته واخراجه فيلم من انجح افلام السينما العربية في تاريخها( غزل البنات ) واستمر انور وجدي من نجاح الى نجاح وصعود بسرعة البرق كما لو كان بيعوض سنين الفقر والعوز وتجاهل الناس له .. وفي الفترة دي انور وجدي كان بيحاول يرد الجميل للناس اللي وقفوا جنبه وهو فقير زي الريجيسير قاسم وجدي واللي تلاقيه كان موجود في تتر كل افلامه وزي مجموعة من الكومبارس زملائه السابقين واللي اصبحوا وجوه مميزة في كل افلامه .. بالاضافة طبعا ليوسف وهبي واللي قدم له انور وجدي ادوار كبيرة ومؤثرة في افلامه تليق به .. .. ولكن للاسف تخيل مرحلة الازدهار في حياة انور وجدي دي واللي عرفناه فيها وشوفنا الافلام الكتير سواء اللي مثلها او اللي كتبها واخرجها لغيره استمرت كم سنة ؟ 10 سنين فقط .. فاول بطوله له كانت في فيلم كدب في كدب سنة 1944 واخر بطولة له كانت في فيلم قلوب الناس سنة 1954 .. حيث انه مات في العام التالي عن عمر 50 سنة فقط وكم شهر ... ...