الولد الشقي: السعدني مثقف وصالح موهوب وإمام ذكي

عادل إمام وسعيد صالح وصلاح السعدني كانوا صحاب واتربوا مع بعض على حِجر الولد الشقي والعبقري المرحوم محمود السعدني، اللي اتسأل مرة عن تقييمه للثلاثة فقال: أكثرهم موهبة سعيد وأكثرهم ثقافة صلاح وأكثرهم ذكاءً عادل. مع موجة تبجيل عادل إمام وموجة شيطنته، صعب أقول عنه مش موهوب، بس موهبته مش طاغية زي فنانين كتير أقل منه حظا. عادل إمام بقى تعامل مع الحقيقة دي بذكاء، يعني مالوش دور مركب مهم، له أعمال ناجحة زي مسرحية الزعيم، أو فيلم الغول، وهو عنده قدرة لا بأس بها في استخدام تعبيرات وجهه، وده ظهر في فيلم صحيح تافه وهو النمر والأنثى خلال تعافيه من الإدمان، لكن مافيش دور له تقول إن مش ممكن غيره يؤديه، دور تحس إنه حقق درجة تقمص تخلي المتلقي يشعر إنه هو الشخصية.. زي محمود حميدة في باحب السيما، أو محمود عبدالعزيز في الكيت كات أو أحمد زكي في زوجة رجل مهم.. لكن عادل إمام قدم توليفة شعبوية الجمهور حبها.. في السبعينات جسد الشاب اللي لابس جاكيت جينز وكوتشي ابن الطبقة الوسطى وما تحتها أي معظم المجتمع، اهتم يبقى أمام الكاميرا شبه الناس، فتعلق به الناس. صحيح إن عادل إمام بجانب ده مش بريء من تهمة التماهي في النظام وتنفيذ طلباته والتحدث بصوته لكن فيه طابور طويل كان مستعد يعمل كده لكن عادل كان أذكى بالطبع. تقديري إن سر نجاح عادل امام يرجع إلى أنه كان عنده مشروع واشتغل عليه بذكاء. الفنان مشروع.. شوف مثلا موهبة مدحت صالح الاستثنائية قياسا بعمرو دياب الأقل موهبة وصوت. شوف آمال ماهر اللي باعتبرها صاحبة خامة صوت غير عادية.. شوف راحت فين. شوف عبدالحليم حافظ اللي الموسيقيين عارفين إنه صاحب صوت محدود الإمكانيات وصل لفين ومحمد قنديل فين ؟ نفاق النظام مش كفاية عشان الفنان يوصل. مبارك نفخ في محمد ثروت ولا قدر يصنع منه ربع نجم. الفنان بدون مشروع يساوي صفر. كان عادل إمام الأكثر ذكاءً وطبيعي يكون الأكثر نجاحا.