— —
⛅ جاري تحميل الطقس…
آخر الأخبار
بمشاركة وزير التعليم ومجتمع الأعمال المصري والألماني ...."الألمانية العربية"تنظم ندوة "مستقبل التعليم الفني والتدريب في مصر "  عوده قطره ندي الفائز بجائزة أفضل عرض في مهرجان مصر الدولي لمسرح العرائس، ا2025  بيت الزكاة والصدقات يطلق أولى مراحل الجسر الإغاثي إلى غزة بـ300 شاحنة لمواجهة موجة البرد الدكتورة سحر نصر تشارك في المنتدى البرلماني العالمي ضمن فعاليات مؤتمر المناخ (COP31) بأنطاليا : وتطرح  حلول لسد الفجوة التمويلية لتعزيز الشراكة بين القطاعين العام والخاص الحلقة الرابعة: مارلين لماذا قتلتها المخابرات الأمريكية..الجريمة الكاملة حصاد الأسبوع الأول | COP31   بين الطموح المناخي وتحديات التوافق والتنفيذ " النعماني"  يجدد تعيين "هاني محمود" مساعدأ لرئيس جامعة سوهاج للابتكار مباحثات لتعزيز التخصص القضائي بين وزارة العدل  و" العالمية للملكية الفكرية ... واعتماد برنامج  ٢٠٢٧ لتدريب القضاة الناس 100 وش تهنئه خاصة بالزفاف السعيد طالع.... نازل محمد زناتي يحصد شهادة التميز في الأشعار عن عرضي «كلمة مرور» و«مملكة السحر والأسرار» بمهرجان القاهرة الدولي للطفل العربي اليوم السادس من "COP31" .. الشباب يتحدون من أجل تأثير حقيقي، وضغوط متزايدة لتسريع المفاوضات حول مستقبل كوكبنا "بيت الزكاة والصدقات" يطلق جسر الإغاثة السادس عشر لقطاع غزة: 1600 طن من المساعدات لمواجهة برد الشتاء القارس بالتعاون مع جهاز مستقبل مصر ومنظومة أمان الحلقة الثالثة: *الدفتر الأحمر والحقنة القاتلة* بقلم: جمال عبد المجيد "مبادرة TeraMed تُحدث ثورة في استثمارات الطاقة المتجددة بالبحر الأبيض المتوسط خلال مؤتمر COP31 رحيل حسام حسن لا يعني فشل المرحلة كشري أبو طارق يحكي تاريخ السينما.. عروض فلكلورية وأجواء احتفالية تخطف أنظار ضيوف مهرجان القاهرة السينمائي الدكتور وائل محمد رضا : الايمان بالمواطنة البيئية قاطرة للتنمية المستدامة نحو مستقبل أخضر وآمن  مناقشات على هامش مؤتمر الأطراف الحادي والثلاثين :  تعزيز فرص الاستثمار لمعالجة هدر الطعام وانبعاثات غاز الميثان
من القلب للقلب
بواسطة Amany • • 779 مشاهدة • 3 دقيقة قراءة

رمضان واللمة الحلوة

✍🏻بقلم د.امانى موسى رمضان مش مجرد شهر فى السنة…رمضان حالة.حالة بتحصل جوانا قبل ما تحصل حوالينا.أول ما الهلال يظهر…كأن القلب بياخد نفس جديد.الروح تهدى…والدنيا، مهما كانت زحمة، تبطّأ شوية.رمضان بييجى ومعاه دفء غريب…دفء البيوت وهى منوّرة،دفء المطبخ وهو مليان ريحة أكل وحب،دفء...

رمضان واللمة الحلوة
صورة توضيحية
مشاركة

✍🏻بقلم د.امانى موسى

رمضان مش مجرد شهر فى السنة…
رمضان حالة.
حالة بتحصل جوانا قبل ما تحصل حوالينا.
أول ما الهلال يظهر…
كأن القلب بياخد نفس جديد.
الروح تهدى…
والدنيا، مهما كانت زحمة، تبطّأ شوية.
رمضان بييجى ومعاه دفء غريب…
دفء البيوت وهى منوّرة،
دفء المطبخ وهو مليان ريحة أكل وحب،
دفء أم بتنادى على ولادها قبل الأذان بلحظات.
اللحظة اللى الكل فيها مستنى صوت الأذان…
ساكتين…
رافعين إيدينا بالدعاء…
وبعد أول تمرة…
نحس إننا مش بس فطرنا…
نحس إننا اتجمعنا.
اللمة فى رمضان مش صدفة.
دى احتياج نفسى عميق جوانا.
إحنا كبشر محتاجين نحس إن لينا مكان ثابت.
إن فى كرسي مستنينا.
إن فى حد مستنينا نقعد جنبه.
الإحساس ده اسمه أمان نفسى.
ولما بنقعد حوالين سفرة واحدة…
التوتر بيهدى…
القلب يطمن…
والعقل ياخد استراحة من صراعات السنة كلها.
يمكن عشان بنفتكر إننا مش لوحدنا.
فى أيام كتير بنرجع بيوتنا وإحنا مرهقين…
شايلين ضغوط شغل…
مسؤوليات…
تعب نفسى…
لكن فى رمضان، القعدة دى بتبقى علاج.
ضحكة صغيرة من طفل ماسك فانوس…
سؤال بسيط: يومك كان عامل إيه؟
إيد بتتحط على كتفك…
كلها حاجات بسيطة…
بس تأثيرها النفسى عميق جدًا.
رمضان بيرجع لنا إحساس الانتماء.
إننا جزء من حاجة أكبر من نفسنا.
إن لينا جذور…
ولينا ناس.
حتى اللى بينه وبين حد زعل…
رمضان بيكسر الحواجز.
بيخلى القلوب ألين.
الكلمة أسهل.
والاعتذار أخف.
عشان كده رمضان مش بس شهر عبادة…
ده شهر ترميم نفسى.
بيرمم العلاقات اللى شرخت.
بيرمم مشاعر اتجمّدت.
بيرمم إحساس كان بيضيع وسط زحمة الحياة.
بس خلينى أسألكم…
هل بنعيش اللمة بجد؟
ولا قاعدين جنب بعض وكل واحد فى عالمه؟
اللمة مش عدد كراسى حوالين السفرة…
اللمة روح.
والبيت مش حيطة وسقف…
البيت إحساس إن فى حد شايفك… سامعك… حاسس بيك.

عايزة أقولكم حاجة من القلب بصدق…
إحنا مش بنخاف من الوحدة عشان مفيش ناس حوالينا…
إحنا بنخاف من اللحظة اللى يبقى حوالينا ناس…
ومع ذلك نحس إننا لوحدنا.
رمضان فرصة.
والفرص مش دايمًا بتيجى تانى.
يمكن رمضان ده يبقى آخر فرصة تصلّح علاقة بايظة…
آخر فرصة تقول لحد أنا مقدرك
آخر فرصة تحضن حد قبل ما الأيام تاخده منك.
محدش فينا ضامن مين هيقعد معاه على نفس السفرة السنة الجاية.
فلو عندك حد مستني كلمة…
قولها.
لو عندك حد بينك وبينه مسافة…
قرب.
لو عندك قلب زعلان منك…
طيب خاطره.
رمضان مش بس شهر بنصوم فيه عن الأكل…
رمضان شهر نصوم فيه عن القسوة…
عن العند…
عن البرود.
متستناش الكرسى يفضى…
عشان تفتكر مين كان قاعد عليه.

رمضان كريم…
ويا رب دايمًا يجمعنا على خير…
قبل ما يفرقنا الوقت من غير استئذان.