لما يحصل لنا "Error" من موقف زعلنا

بقلم د.أمانى موسى

✍🏻لما يحصل لنا "Error" من موقف زعلنا
أوقات فعلا بنحس إن في لحظة حصل لنا فيها "Error".
موقف بسيط… كلمة اتقالت بسرعة… تصرف ما توقعنهوش…
وفجأة النظام كله يهنج.
نبقى كويسين، عاديين، ماشيين في يومنا…
وفجأة حاجة صغيرة تضرب على جرح قديم جوانا،
فنلاقي رد فعلنا أكبر من الموقف نفسه.
ليه؟
لأن اللي حصل مش أول مرة.
الموقف الحالي بس ضغط على زرار قديم متخزن جوانا.
ذكرى، إحساس بالرفض، خوف من الفقد، إحباط متراكم…
كل ده بيطلع مرة واحدة.
العقل ساعات بيعمل زي الكمبيوتر:
لما الملف يبقى تقيل ومليان حاجات ما اتقفلتش صح،
أول ضغط زيادة… يظهر الـ "Error".
الزعل مش ضعف.
ورد الفعل القوي مش معناه إننا دراما.
هو بس معناه إن في حاجة لسه محتاجة تتفهم،
مش تتخبّى.
المهم مش إن الـ Error يحصل…
المهم إزاي نتعامل معاه.
نقف لحظة.
نسأل نفسنا:
أنا متضايق من الموقف نفسه؟
ولا من إحساس أقدم رجع لي؟
لما نفهم السبب الحقيقي،
الوجع بيهدى نصه.
ولما ندي نفسنا فرصة نهدأ قبل ما نرد،
بنمنع أعطال أكبر.
إحنا مش أجهزة…
لكن زي أي نظام، محتاجين نعمل “تحديث” من وقت للتاني.
نفضفض، نواجه، نسامح، ونقفل الملفات المفتوحة.
لأن أوقات المشكلة مش في اللي حصل…
المشكلة في اللي حصل قبل كده ولسه عايش جوانا.
والوعي هنا…
هو زرار إعادة التشغيل الحقيقي.