هل اللحوم المجمدة ممكن تكون بديل للبلدي ؟

بقلم /الدكتور أحمد حمدي الشبح مع قلة وجود العجول البلدي في سوق اللحوم وانتشار المستورد منها بدأت الناس تحس بفرق الطعم برغم إن الجزار هو هو كمان الارتفاع الملحوظ في اسعار اللحوم بشكل خلى الناس تقلل من معدلات استهلاكها المعتادة وأكيد مفيش حد فينا ماجاش في ذهنه السؤال ده هل اللحوم المجمدة(بسعرها الأقل) ممكن تكون بديل يعوض شوية لحمة الجزار وهل هي كويسة ومغذية ؟؟! أنا هجاوبك ع سؤالك تعالو نتناقش في الموضوع بالراحة وبهدوء إيه هي اللحوم المجمدة دي : اللحوم المجمدة لحوم لعجول سواء بقري أو جاموس مذبوحة في بعض الدول أشهرها البرازيل والهند (من أهم شروط استيراد اللحوم الذبح الحلال) وبيتم حفظها بالتجميد لتسهيل نقلها عبر القارات للدول الأخرى طيب ليه هي أرخص ؟ لأن سعرها في الدول دي رخيص جداً نظراً لوجود المراعي الطبيعية هناك وقلة تكلفة التربية وكمان توفرها بأعداد كبيرة جداً. هل فعلاً كويسة ؟ كويسة طبعاً لأنها لحوم لعجول حية تم الكشف عليها في أكبر المجازر والقيمة الغذائية ليها نفس البلدي ؟ بنسب متقاربة جداً لكن طبعا هي بتفقد جزء منها نتيجة عملية التجميد الطويلة . ونتيجة تكوينها العضلي المختلف طب ليه طعمها غير البلدي ؟ علشان نوع الغذاء هناك مختلف فهو المراعي الطبيعية مش زي الاعلاف المصنعة والمخلطة عندنا كمان نتيجة إن الحيوانات دي بتتحرك بحرية في المساحات الكبيرة فعضلاتها أقوى وأنشف من البلدي المحبوس في المزرعة وحركته محدودة طب العجول دي صغيرة ؟ غالباً بتكون كبيرة في السن وأوزانها كبيرة طيب مضمونة ؟ طبعاً لأن بيتم الكشف عليها من طاقم طبي كبير والمجازر بتكون مجهزة على أعلى مستوى طب إيه أهم مشاكلها ؟ النقل والتخزين والحفظ لازم يكونو في درجات تجميد معينة علشان تحافظ عليها ومتفقدش خواصها الطبيعية. تنصحني بإيه وأنا بشتريها ؟ تتأكد من تاريخ الصلاحية والبيانات الموجودة على الغلاف وتتأكد من طريقة الذبح وكمان إنها مجمدة كويس وميكونش حواليها أي رواسب او سوايل سواء سائلة او مجمدة وما يكونش عليها لون غريب او أي تغيير في اللون الطبيعي للحوم صلاحيتها بتكون كام ؟ ١٢ شهر من تاريخ الذبح سعرها بيكون رخيص قد إيه ؟ نص تمن البلدي هل فعلاً تكون بديل للبلدي ؟ في ظل الظروف دي ممكن طبعاً