مريم يعقوب تكتب: إوعى يجيلك محجوب

الشخصية دى مبتنتهيش يعنى ملوش تاريخ صلاحية هو مستمر إنما ف أشكال متعدده متطورة بتلائم المجتمع ف كل فترة من فترات حياتنا إللى محتاجة تحديث للطريقة أو الشكل العام ليها إنما محجوب عبد الدايم هو هووووو بقرونه بتفكيره بكل ما فيه من توجهات .. محجوب عبد الدايم ممكن تشوفه فصورة واحد عامل فيها الشهم الجدع إللى مفيش منه اتنين وبيجرى على حقوق الناس ويقف ضد الظلم والقهر وقلبه على الغلابة والمساكين والمحتاجين وهو أول واحد بيدور على الاستفادة والمنفعه من وراهم او بمعنى اصح من التجارة بيهم لحسابه ولحساب اسمه او مصلحته او الكرسى اللى قاعد عليه ممكن تشوفه وانت واقف عند باب كبير أوى واخر نظرك جايب مكتبه الفخم وكام ورقة على كام دوسيه لزوم البرستيج الخاص بفخامته لانه مشغول جدا مشغول خالص مشغول بالتريكو والتليفون على ودنه من كتر المكالمات مش بيفارقه طبعا امال ايه ماهو راجل مهم برضه وبيساعد الناس وعايش بسسس علشان يخدمهم ويقضى احتياجاتهم وطبعا مفيش مانع من كام صورة على كام خبر ينزلوا ف كام موقع علشان الناس تقدر وتشوف بعنيها انجازاته المبهررررة ف تاريخ عمله واهو بالمرة يشبع نفسه بالتمجيد والتهليل ليه وكمان تكتمل الرسمه إللى راسمها على الناس امال إسمه يرن فالمحافل العامة ازاى !!! مش لازم برضه الشووووو يشتغل والاضواء تعرف طريقتها ليه !!! بس خلى بالك ومتنساش ان اهم السمات اللى بيتحلى بيها الاخ محجوب هى التلون السريع جدا وتغيير الجلد المفاجىء يعنى ممكن كمان تشوفه ف صاحب رساله سامية عظيمة رسالة حب وسلام ماهو ميمنعش الشغل يكون بالحب برضه يعنى لزوم التثبيت النفسى والإستقطاب للمحرومين من الانسانية والسيطرة على عقولهم واللعب بمشاعرهم وطموحاتهم وطبعا كلنا عارفين ان طول ما الطماع موجود فالنصاب موجود وده نوع من النصب اسمه النصب العاطفى ف يستخدملك حبة شعارات على شوية اجتماعات وندوات ولقاءات وتجمعات يلقى فيها اجمل واروع وارقى الكلمات ولأنه انسان طول عمره مضحى من أجل المباديء والقيم فإنت فى كل الاحوال هتلاقى رسالته النبيلة بتحلق فوق راس حضرتك وانت قاعد من ضمن الطابور اللى بيسمع .. وفى بقا محجوب المتدين المتستر وراء التقوى والورع وبعض من السلوكيات الظاهرة لتدينه العظيم وطاعته الواجبة ده بقا حدث ولا حرج سوقه ماشى حلاوة وتصريحاته نارية لأنه للاسف بيخاطب كتير من الجهله اللى بيصدقوه وبيمشوا وراه كما القطيع بالظبط لعلهم ينولوا الرضا او يفوزوا بصك الغفران من خلاله وتحل عليهم البركه لأنه راجل بركه ده هيحلل ويحرم على هواه أصله واخد الحدوتة تفصيل عند ترزى معتبر أمال هيصنع ازاى التأثير والمكلمة على إسمه الا لو كان شاذ عن القاعدة وعامل صداع وبلبلة كل فترة والتانيه ده عيب حتى يطول مدة غيابة لاحسن الناس تنساه.. اهو يمكن حد يعبره ببرنامج يطلع فيه يهبد واهو يطلعله بقرشين مصلحة الخلاصة إن محجوب عبد الدايم قادر على تقلد أى منصب وأى صورة وقادر على خداع الكثيرين من الواهمين أو الطامعين أو الحالمين ده هو اصلا قريب منا جدا لانه بيتغذى على الجهل والفقر والطمع والجشع وحب السلطة والمال والمصالح والفساد والشللية والرشاوى وقلة الضمير والفساد بكل صوره فلا تصنع بصمتك وجهلك محجوب عبد الدايم علشان قرونه هتنطحك ف لحظة تجيب أجلك ماهو بجح مبيتكسفش شايل برقع الحيا من قبل مانت تتولد