كمال الشناوي: أنور وجدي كافح حتى أصبح نجم النجوم

كمال الشناوي بيحكي عن موقف مؤثر ليه مع انور وجدي بيقول : " مع بداية ظهوري كان انور وجدي هو فتى الشاشة الأول ، و وقتها الناس فهمتني اني هكون منافس لأنور وجدي و فعلا كانت حقيقة .. فى مرة من المرات كنت بعمل فيلم مع حلمى رفلة ، و إحنا في الأستوديو كنت عاوز أتكلم فى التليفون ، و المكان في جهازين للتليفون واحد تحت والتانى فى غرفة الإنتاج ، فقمت برفع السماعة عشان أتصل لكني لقيت حلمى بيتكلم لـ شخص من جهاز التليفون في غرفة الإنتاج فقفلت السماعة ، و بعد شوية توقعت انه أنهى المكالمة فرفعت السماعة مرة تانية لكني لقيت حلمي بيكلم أنور وجدى و باين إنه زعلان جدا ، و بيلومه انه عاملى 3 أفلام و بيقوله " بقا تسيبني و تجيب واد من الشارع تعمله نجم.! " أنور وجدى كان خايف أوى على مكانته و إنه مش هيفضل النجم الأول و من وقتها جاتلي عقدة من أنور وجدى .. و في مرة صحفى أجرى معايا حوارا و سألني على رأيي فى أنور وجدى ، و طبعا أنا شايل منه من وقت ما وصفني بأني واد من الشارع ، فقولت له .. " هو بيعتبرنى منافس له لأن أنا أصغر منه سنا و أقدر أعمل أدوار هو ميقدرش يعملها ، وهو كبر وبقى كرشه قدامه وأنا معنديش كرش .. " و بيكمل كمال الشناوي و يقول : " بعدها أنور قابلنى بالصدفة فى أستوديو مصر ، و قالى بعتلك كتير تيجي تشتغل معايا و حتى مش بترد عليا ، " كان أنور وجدى وقتها دخل مجال الإنتاج والإخراج " و عاتبنى على حديثي و قال " أنا معنديش مشكلة تقول عليا ممثل وحش أو ما أنفعش ، لكن ليه تقول كرشي قدامي ده كتير ! ، أنا زمان جربت الجوع و كنت بقسم ساندوتش الفول أفطر بنصه واتعشى بالنص التانى ، و لما بقا معايا فلوس بقيت بأكل كتير علشان أحس بالشبع و أنسى إحساس الجوع إللى إنت ماجربتوش ، و ده خلاني أصيبت بمرض فى المعده ملوش علاج ، و ده هو سبب وزنى الزايد " بيقول كمال الشناوي انه انهار من البكاء بسبب كلامه و اخده في حضنه ، و أصبحوا بعدها أصدقاء مقربين و بعد رحيل انور وجدي قام كمال الشناوي بإنتاج فيلم "طريق الدموع" عن قصة حياة صديقه أنور وجدى ، و جسد فيه دوره وجسدت فيه صباح دور ليلى مراد ، أما ليلى فوزي فمثلت دورها الحقيقي ..