عفوا لقد نفذ الرصيد

الشاعر : هاني آدم عفوا لقد نفذ الرصيد الوحى خلص بطاريات الكلام حان وقت تحضير الشنط ودع حبايب موجودين عشمان تقابل غيرهم راح لم إللى سرسب من آهاتك و الجراح سيب الوليه تقابل الليل و النهار على ذكرى تار بين إللى كان ليها كل حاجه و كل حاجه كانت معانداه فى البراح و بلاش شنط الميتين مش محتاجين غير دعوه صافيه و ذكرى دافيه و متر قماش السكر داب فى كلامى و باش ما قدرش يحلى الدنيا لحد و لا لحديده ............ جديده فكرة إنك تموت جوه القصيده و أنا أول شاعر حس بنهاية ديوانه حس إن ده مش أوانه عاش فى حلم و مات فى كابوس كائن ملبوس رافض التطبيع مقاطيع طلعوا على كتافه فوق ما أكلش حقوق و لا خد حقه كان بيزق الشوق و يزقه عشمان يا حزين تضحك على مين .......... سنين بتعزف أغنياتك للغلابه فى وسط غابه فيها القوى بياكل الضعيف حريف وجع و الفرحه لو يوم قربتلك تتحرق عمرك و حلمك بيتسرق و عامل ندمان من إمتى كان صوت الأدان بيحرك عاصى يا ناسى قبلة كلمتك ونسان بحضن مخدتك مخنوق بهوا مفيهوش حريه ........... و هى هى المسرحيه نفس أشكال الغوانى و نفس إخراج اللصوص غيروا شويه النصوص لكن الفينال و لون الستاره و اللى قاعدين ع الكراسى و المآسى و الإيراد ناحت فى صخر بإيد ضعيفه نضيفه كانت نيتك و كانت دوافعك لكن النتيجه كانت مفيش يا هل ترى هتؤجر على خسائر حروبك و لا تؤجر على المفيش تعريف وجودك جنب مليون حاجه صح و لا الأصح عدم وجودك