بالصور: هنا قبر عمرو بن العاص فاتح مصر العربية

‏حاجه مكنتش عارفها ولازم تعرفها معااايا نقرأ بقي كده ‏انت هتركب اي مواصلة للمقطم في القاهرة و هتنزل عند القرافة ‏تمام ؟ تطلع ع الأباجية و تسأل عالقرافة الصغرى ‏هتلاقي مسجد اسمه "مسجد الليث بن سعد ‏هتدخل و تفضل ماشي هتلاقي ضريح ذو النون المصري ‏هتخليه على يمينك و تفضل ماشي هتلاقي نفسك بين ضريحين ‏واحد مكتوب عليه رابعة العدوية ( أيوه رابعة العدوية مستغرب ليه ) أصبر بس التقيل ورا و التاني هتلاقي مكتوب عليه ‏محمد بن الحنفية بن علي بن ابي طالب ( آه و الله) ‏هتسيبهم و تكمل مشي هتلاقي بره كده على يمينك قبة مكتوب عليها ضريح الشريفة فاطمة حسن الأنور. خد نفسك شوية و كمل مشي هتلاقي مسجد سيدي عقبة بن عامر الجهني ‏( كل دول اسيادنا من السلف الصالح خللي بالك) ‏هااا الحمد لله وصلت ؟ ‏شايف بقى الضريح ابو قبة الكبير ده اللي في نص المسجد ؟ ‏سيبك منه دلوقتي لان ( الموضوع كبير ) و كمل لحد الباب الخلفي للمسجد هتلاقي مربع متر في متر مدهون دهان أخضر تعبان قوي موجود عالارض عدل لا يا جميل ده مش مصطبة بلدي بتاعة واحد غلبان عشان سيادتك تقعد و تأنتخ عليها ‏ده بقي و يا عارنا المخزي يبقي قبر سيدي و سيدك و سيدنا كلنا عمرو بن العاص مشفتوش مهزلة اكتر من كده ؟ ‏لا يا سيدي مش مدفون في المسجد اللي في مصر القديمة زي ما كنا فاكريين طب ليه مفيش قبة ومحدش يعرف مكانه؟ ‏لان تم تهميشه بشكل مبالغ فيه ايام الفاطميين و اكيد عارفين ليه الفاطميين الشيعة بيكرهوا سيدنا عمرو بن العاص ‏و الخلاف معروف تاريخيا و مش وقته دلوقتي ‏طب ليه محاولوش يبنوا قبة بعد الفاطميين ؟ ‏عشان كانوا بينفذوا وصية عمرو بن العاص انه محدش يبني على قبره قباب و شواهد و يبقا قبر بسيط و صغير و كمان خوفاً عليه من الشيعة و جبروتهم طب العظماء دول مدفونين هنا ليه ؟ ‏المقوقس كان ماشي مع عمرو بن العاص مرة فقالوا ان المقطم بيطلع فيه شجر من الجنة و انه مكان طاهر و سيدنا عمر بن الخطاب وصى بدفن المسلمين فيها. خلصت لف ؟ ‏اخرج بره خالص بقي و انزل تحت في القرافة الكبرى هتلاقي بقا الإمام الشافعي والملك العادل وقايتباي و خلفاء المماليك والعباسيين والفاطميين و المقريزي وابن عطاء الله والإمام الشاطبي اشهر من جمع قراءات القرآن على مقربة منهم و كل اللي ودنك سمعت عنهم من قبل اتفرج و استمتع و اتعلم و اعرف تاريخك الاسلامي و سيبك بقى من تفاهة الاسطورة و الام المثالية و الهام و النجم و الاسطورة و يا ريت تاخد إبنك في ايدك و انت رايح يا خسارة رموزنا الحقيقين معلش تعبتك معايا بس لازم نعرف الأرض اللي احنا واقفين عليها كويس.