أنا وأمى

... أنا وأمى بقي لنا سنين ما شوفناش بعض ولسه كمان سنين وسنين ليوم الوعد يوميها كمان مش عارف ها اشوفها فين ؟ وترجع تاني ايامنا أشوف السعد ف يوم الوعد كانت " بشري" لكل الكون تبات الليل لنور الفجر سهرانه ..دعا وتسبيح تصلي الفرض في ميعاده كانت تسهر لحد الصبح تقوم تدعي لكل الناس خشوع حساس كانت ليا نسيم الروح وروح الروح كانت تصحي تغطيني ف عز الليل تدفيني .ف عز البرد كانت تحلم عشاني كتير واحلامها تاخدني لفوق تهنيني أروح لبعيد .وأرجع تاني تهديني سلام الروح حنان القلب اللي ما يعرف شر ولا بتتغر ولا بتغريها دنيتنا تاخدني لفوق ف احلامها ف أحضانها مشاعر دافية وعفية وجاني يوم شفت عينيها مرضانة وزعلانة وحبة قلبي تعبانة وعيانة قعدت حزين خدت عقلي وروح قلبي واحساسي خطفها الموت وسابني وحيد بلا أحلام .ولا أيام ولا انغام .ولا ايدين بقلب الرحمة تفديني تغطيني .ف قلب الليل تدفيني .ف عز البرد تهنيني بنظرة حب رباني وبعدك عني رباني يوميها صحيح كان نفسي أموت وتعيش وتفضل وردة ريانة عبير للكون ..لكل الكون ويفضل نورها جوايا ينور لي طريق الخير لكل الغير لكل الناس اللي عرفوها وشافوها .. وحتي الغير كانت "بشري " طريق النور ويرسملي ملامح نور ونور علي نور بقيي لي سنين .علي دا الحال أردد بيني وبين نفسي كلام موال فضل عايش في وجداني يرجع لي أحلامي ويسحب مني احزاني مع الأيام بقت ذكري في وجداني بقي لي سنين أنا وهيه ماشوفناش بعض ولسه كمان سنين وسنين .ليوم الوعد وانا عايش في احضانها واحلامها .. بقي لي سنين أنا وامي