أنا مالى يا عبيط
الشاعر : هاني آدم عمر الشاعر ما بيتحسبش سنين و لا كام قصيده و كام حساب جارى قصيده كان نفسي اتحبس فيها و قصيده سحلت فيا أشعارى أنا عمرى كله خلص ما بين شطرين مسكين يا شاعر حلمه كله كلام ملفوف فى قرطاس قرص طعميه يا بنيه عاقده النيه على تعذيبى و جيبى مخروم وقع الفكه أحلام صب
مشاركة
الشاعر : هاني آدم
عمر الشاعر ما بيتحسبش سنين
و لا كام قصيده و كام حساب جارى
قصيده كان نفسي اتحبس فيها
و قصيده سحلت فيا أشعارى
أنا عمرى كله خلص ما بين شطرين
مسكين يا شاعر حلمه كله كلام
ملفوف فى قرطاس قرص طعميه
يا بنيه عاقده النيه على تعذيبى
و جيبى مخروم وقع الفكه
أحلام صبيه و واقفه على تكه
.......
و إندبى يا بلادى حظك الاسود
فى ولادك الراضيين بالفتافيت
يا غرا الكرسى و وعد المنسى
يا شباب محبوس عرسان توابيت
و أنا مالى يا عبيط
........
أنا مالى يا عبيط منك ليها لوه
إذا كانت العبوديه فى دمك
و البرسيم مشروبك الرسمى
أنا مالى لو كانت الحريه
بتقلق نومك
و تعرى كلابك و نجومك
مفترى و حويط
أنا مالى يا عبيط
.......
لو كلمة حق من الغلبان
بتهز كراسى كل الطواغيت
و تشق الأرض تطلع قرد
تزود فرض على المساخيط
أنا مالى يا عبيط
..........
أحسن حاجه تعملها يا صاحبى
فى ظروف زى دى إنك ما تجيش
تكسر سن القلم إللى بيضرب
فى المليان
تكتب فى الهلس و فى العريان
و تشجع كوره و تموت م الخوف
مش وقت الشعر و لا الحواديت
و أنا مالى يا عبيط
#هانى_آدم
