نصائح عامة في "فن" التشطيبات

رؤية.. الفنانة التسكيلية.. عزة الصبروتي - وانت بتشتري شقتك ماتشغلش بالك زيادة عن اللزوم بالضيوف ، لأنك هتشوفهم كل سنة مرة .. شوف الانسب ليك انت وعيالك وحياتك اليومية - لو شقتك على شارع ضيق وعندك بلكونة مجروحة ، قفلها الوميتال وكبر الصالة افيدلك والالوميتال انواع كتير افضل قطاعاته شريف علي حسن وحساب الالوميتال بالمتر في شبابيك المطبخ والحمامات اقل من المتر بيتحسب متر بس في شبابيك الريسبشن والغرف والأبواب الالوميتال بيتحسب بالسنتي،، اي لون زجاج عاكس بيبقي عاكس بالنهار بس اوعي حد يضحك عليك.  - (الجيبسوم بورد)سعره حسب رسمته ، بس في المتوسط احسب الاوضة طول في عرض واضرب في 140ج. - الدهانات البلاستيك احسن من الزيت بس تجيب نوع نضيف (يوتن _سايبس_ناشيونال _سكيب ) خد من كل شركة احسن خاماتها يعني متاخدش من يوتن الوان لانها علي الحيطة بتفرق 7 درجات عن ما بتشوفها في العينات خد من ناشيونال المعجون بتاعهم معقول خد من سايبس البلاستيكات بتاعت البطانة والتشطيب خد من سكيب الالوان وخد من يوتن الوان الديكور ولازم قبل المعجون وش سيلر - الدهان الاوستر اشيك من اللاكيه غالبا في الخشب وليكن في معلومك ان النقاش حاجة والاستورجي حاجة تانية متخليش النقاش يعمل الاوستر النقاش مش استورجي كمان مرة النقاش مش استورجي - الباب المصفح التركي او الايطالي افضل ومتركبش المسامير الصغيرة اللي بتيجي مع الباب هات مسامير بفشر طويلة من عند الموان - سيراميك الحوائط حاجة والأرضيات حاجة. - احسن سيراميك الجوهرة وكليوباترا و آرت، ولو عايز رخيص هات ليسيكو أو اينوفا وفكك من الامير والفا والأمراء ورويال - لو نفسك تركب بورسلين ومستغلي ثمنه ، هات سيراميك قطع ليزر هيكون ارخص شوية وشيك جدا . إياك ثم إياك تجيب بورسلين صيني بيفك بعدها بشهر . - هات الخلاطات ايديال ستاندارد عشان تعيش معاك بدل ما كل شوية تغيرهم - في تأسيس السباكة هات كل مواسير المية واكسسواراتها باننجر او اكواثيرم ، وبعد التركيب اتصل بالشركة هيعملولك اختبار مجاني وبعدها لازم وضمان خمسين سنة والصحي ديورافيت ضمان مدي الحياة بس البانيو هات بانيو الطيب متجبش اي ماركة تاني خلي الكهربائي يعمل زرار تشغيل وغلق للشفاط في المطبخ والحمام عشان الحبل لو اتقطع لا قدر الله يبقي الزرار شغال - ماتسترخصش في اسلاك الكهرباء وهات السويدي الاصلي (عشان في مضروب ) أو السمكتين أو اسكندرية - هات لقم ومفاتيح الكهرباء معروفة واحذر اللي ملوش اسم لأنه كل شوية هيضرب - اصرف عالمحارة على قد ماتقدر وهات صنايعي نضيف وغالي لان عيوبها بتعمل بلاوي ومابتتصلحش وبتاع المصيص قولله مش عايز جبس مقتول وهو هيفهم عشان ميقشرش المعجون - زود فيش كهرباء كتير في كل حتى مش هتخسر بس هتفيدك جدا - لو عرفت يبقى عندك حمامين يبقى شيء رائع جدا عشان ولادك هيعذبوبك لو عندك حمام واحد - المطبخ الاميريكان مريح نفسيا لست البيت - سيراميك الحوائط بيوصل لغاية قبل السقف بحوالي 5 سم عشان بعد ماتخلص تركب كورنيشة خشب او جبس عشان الشكل - هات أكر البيبان غالية ومتينة عشان لو رخيصة عيالك هيبوظوها بعد شهر - في السيراميك : لو الأوضة او الطرقة أضلاعها منتظمة ممكن تعمل السيراميك عدل، لكن لو مش منتظمة والحيطان مايلة اعمله سمبوكسات (زاوية 45) عشان تداري العيب بس لاحظ ان الزاوية 45 بتزود في عدد امتار السيراميك حبة صغيرين عشان الهدر واهتم كتير قبل تركيب السيراميك بنضافة الشقة من الرتش وبواقي الجبس قبل ما تفرش الرمل - الرطوبة اللي بتظهر في الحيطة وتقشر الدهان مالهاش اي علاج سريع ، دي ليها حل واحد متعب، ابقى اشرحه لو حد محتاجه تعديل: (حلها النهائي مؤلم جداً لانه جربنا اي حاجة تانية منفعتش لازم المحارة تتكسر وتتنشف كويس بالبشبوري وبعدين نجيبلها مادة عازلة من كيماويات البناء الحديث وتتضاف علي اسمنت المحارة مع اضافة مادة السيكا مع مونة المحارة للاسف هو ده الحل الوحيد الموجع جداً جداً خاصة بعد التشطيب) - لازمٱ وحتما ولا بد ان مبيض المحارة يحط سلك شبك في اماكن التقاء الخرسانة مع الطوب ، وإلا هتشرخ بعدين ومش هتتعالج بلاعة المطبخ ضروري جدا تكون في اقرب مكان لباب المطبخ وياريت ميزيدش مقاسها عن 10 *10 - رخامة المطبخ ماينفعش تبقى رخام ، لازم جرانيت لأن الرخام هيتنقر ويشرخ - ابوس ايدك ماتعملش شباك مناولة للمطبخ وحواليه طوب حراري، عشان الموضة دي بطلت من أيام المماليك - البلكونة هاتلها دهانات خارجية (كومبليكو) أو خلي مبيض المحارة يعملهالك (جرافياتو) أو قوله (مادة) وهو هيفهم - لازم تقف عالشغل بنفسك وتستقصى عن كل بند لأن الصنايعية متعودين عالكروتة الا من رحم ربي - زود فيش كهرباء في المطبخ عشان مراتك تحبك - اختار شقة مطبخها كبير عشان تحبك اكتر - حاول تفصل بيبان الغرف عند نجار محترم وماتشتريهاش جاهزة من السوق لو تقدر .