محمد حسين بكر مصور فن الزمن الجميل

بقلم : مي مختار عندي صديق في عمارتي بيمتلك استوديو للتصوير الفوتوغرافي في مدخل العماره وارثه عن والده صديقي مصور فوتوغرافي مشهور تخطي السبعين ووالده كان مصور ايضا مشهور ورائد التصوير الفوتوغرافي في فترة التلاتينات والاربعينيات اسمه حسين بكر صديقي الفنان محمد بكر معظم الجيل الجديد للأسف ميعرفهوش ولا حتي يعرف يعني ايه كاميرا لان التصوير بالموبايل لحس عقلهم وده غصب عنهم طبعا وحال الدنيا ، المصور حسين بكر والد صديقي هو اللي سجل بعدسة الكاميرا اروع مشاهد في تاريخ السينما( شباك حبيبي ، عنبر ، حكايه ورا كل باب ) وغيرهم كتير من أعمال عظيمه وكان المصور الخاص للملوك والرؤساء، في زيارتي لصديقي الفنان محمد بكر ومقابلته الكريمه البشوشه الاستوديو صحيح متواضع جدا بس ريحة الزمن الجميل طلّه من الحيطان صور ابيض واسود ثروات مدفونه محدش يعرف عنها حاجه محدش يعرفها غير أصدقاؤه المقربين وبس ، صديقي حكي لي عن مناسبة كل صوره من الصور اللي صورها في أفلامه( دعاء الكروان ، معبودة الجماهير ، ثلاثية نجيب محفوظ ، سماره ) وغيرهم من كنوز أفلام سينمائية ارث ضخم لمشاهير سينما الابيض والاسود لازم يتوثق من قبل وزارة الثقافه بس للاسف احنا عندنا وزاره لكن ماعندناش ثقافه الحفاظ علي التراث. محمد بكر من حقه علي الدوله انها تكرمه وتكرم اسم والده والأجيال الجديده تعرف يعني ايه تصوير وتوثيق بالكاميرا ويعني ايه أرشيف كنوز الصور وقيمة فنانينها اللي في الظل . في اكتر من وسيله للتكريم يا وزارة الثقافه منها إقامة معرض دائم للصور في مكتبة الاسكندريه ممكن كمان تحويل الاستوديو الي مزار خاص لمحبي فن التصوير الفوتوغرافي وياريت لو الوزاره تبعت حد متخصص في ترميم الصور القديمه علشان نحافظ عليها من الزمن ، وفي وسط كل العتمه دي في بقعة ضوء جايه من بعيد من الاكاديمية المصريه في روما عملت لصديقي محمد بكر معرض دائم للصور هناك اسمه " هوليود الشرق" . دي مبادره مني للحفاظ علي تراث صور افلامنا الابيض واسود القديمه بس السؤال اللي مش عارفه له اجابه هو احنا فعلا عندنا وزاره اسمها وزارة الثقافه ؟ ولو موجوده ياتري ايه الجهود اللي بتبذلها للحفاظ علي التراث ؟