في ظل غلاء الأسعار معلومة عن اللحم الجملي ومميزاته وعيوبه

الدكتور ـ أحمد حمدي الشبح مدير إدارة المجازر والتفتيش بسوهاج الناس اللي بتسأل هل لحم الجمل مفيد أم لا ؟ وهل ممكن المسنين والأطفال يأكلوه ؟ بكتب المقال ده علشان أقولهم ببساطة لحم الجمل مفيد جدا. وبشيء من التفصيل فلحم الجمل مفيد لأنه محتواه من البروتين طبعا مرتفع جدا وده يخليه مناسب لكل الفئات، وخاصة الأطفال في مرحلة النمو والرياضيين لبناء عضلاتهم والمسنين والحوامل وكل فئات الناس. محتواه من الدهون قليل لأن الجمل يخزن دهونه معظمها في السنام، إنما اللحم نفسه محتوى الدهون فيه قليل، والسعرات الحرارية فيه قليلة وده بيخليه مناسب للى عاوزين يخسوا. محتواه من أحماض أوميجا3 ، 6 مرتفع والكوليسترول الضار فيه منخفض وده بيخليه وسيلة وقاية من أمراض القلب والشرايين. سهل الهضم عن بقية أنواع اللحوم وده بيخليه مناسب للأطفال والمسنين طبعا. محتواه عالي من الحديد وده بيخليه مثالي في الوقاية والعلاج من أنيميا نقص الحديد. محتواه المرتفع من الجليكوجين بيخليه مصدر للطاقة مناسب جدا للرياضيين وأصحاب المهن الشاقة. بيحتوي على نسبة مرتفعة من الزنك وده بيخليه مهم لدعم الجهاز المناعي. محتواه من المعادن والفيتامينات وخاصة الحديد والزنك والمغنسيوم والبوتاسيوم بيخليه مفيد لكل الفئات العمرية، وخاصة للحوامل والمرضعات. لحم الجمل له طبيعة ملينة، غير بقية أنواع اللحوم التي تسبب الإمساك، وده بيخليه مناسب للوقاية من الإمساك ومضاعفاته. طيب فيه سؤال الناس بتسأله، أيهما أفضل الجملي الصغير أم الكبير؟ الإجابة طبعا كل ما كان سن الجمل أصغر كل ما كان طعم لحمه أفضل وأسهل فى التسوية، وأحلى لحم جملى ممكن تاكله هو (القاعود) اللى سنه من 4-6 شهور. الجملي كل ما كبر سنه لحمه بيبقى أصعب في التسوية، وببساطة نقدر نقول إنه مينفعش يتسوى غير مفروم، كفتة جملي يعني، لكن ده ميمنعش إنه مفيد ومناسب للجميع برضه لكن طعمه مبيكونش بلذة الجملي الصغير. ولو هتشتري لحم جملي من الجزار فتعرف الجملي الصغير من شكل الختم اللى على اللحم، ختم الجملي الصغير بيكون دايرة مكتوب جواها (جم) لكن الجملي الكبير ختمه مربع الشكل مكتوب فيه أيضًا (جم). لحم الجمل مفيد جدا ومفيش قيود تمنع أي حد من تناوله، لكن ما زاد عن حده انقلب لضده، لحم الجمل يتاكل مرة أو مرتين أسبوعيا مش أكتر من كده، لأن محتواه من الصوديوم مرتفع وده بيخليه مش من الأمان إنه يتاكل أكتر من مرتين أسبوعيا. كمان طبعا مرضى النقرس ممنوعين منه أو لازم يأكلوه بحرص شديد زيه زي كل اللحوم الحمرا.ء وطبعا لحم الجمل زي أي مادة غذائية ممكن حد يكون عنده حساسية ضدها، فطبعا لو ظهرت أعراض حساسية زى الطفح الجلدي أو الحكة أو ضيق التنفس أو تورم الوجه أو غيرها على حد بعد تناوله، يراجع طبيب يوصفله مضاد حساسية على حسب حالته، ويعرف إن لحم الجمل بيسببله حساسية فمياكلوش. وطبعا الجمل ممكن يصاب بأمراض عادي جدا زي أي حيوان، علشان كده مهم نراعي تسوية اللحوم كويس قبل تناولها، وده العادي اللى مفروض يتم في أي لحوم. فمفيش أي مانع إن أي حد يستبدل اللحوم البقري اللي أسعارها مش مناسباه باللحوم الجملي، بالعكس ده هيبقى صحي جدا واقتصادي كمان, وممكن على فكرة يساهم فى خفض أسعار اللحوم الأخرى. اللى بيحبوا اللحوم الجملي بطبيعتهم ياكلوها عادى جدا بالهنا والشفا ويستفيدوا من فوايدها، لكن لازم يطبقوا قاعدة ما زاد عن حده انقلب إلى ضده