عانس بمزاجي

تقدمه: د.أماني موسى رسالتي إلى المحرر تحكى “ا.م .ع” أنا عمرى ٣٧سنة متعلمة وبشتغل وناجحة فى شغلى جدا كل الناس بيحسسونى انى أقل منهم وانى عبء عليهم خصوصا أسرتى بيعيرونى انى كبرت وانى عانس وماما اوقات كتيرة تبكي ومحرجة من صحابها وجيرانها لانى انا الوحيدة في بنات العيلة لم اتزوج بقيت أعيش أيامي بلا هدف وبدعى ربنا أنه يسامحني لأني اوقات بحسد بعض صديقاتى على الزواج وتكوين اسرة وحاسة أن ده عقاب من ربنا ليا على حسدى لهم بسمع كلام كتير “حاتعنسي وماحدش حايبص لك، وإنتي كبرتي خلاص اتنازلي واتجوزي أي حد حتى ولو حاتتطلقي بعد كدة" إلحقي نفسك.. القطر حايفوتك ومش حاتعرفي تخلفي، البنات الكبيرة دول ماحدش بيبص لهم” بسبب الكلام ده بدأت حالتى النفسية تتأثر لكن مش قادرة اوافق على شخص مش مناسب ليا فى عقله وتفكيره والموضوع ده سبب لى احباط وبحس بالفشل فى الحياة مع انى ناجحة فى شغلى وليا مستقبل كويس وبحاول افهم أهلى انى ممكن اوافق باى شخص والسلام وبعدها أطلق هيكون وقتها وضعى ايه ونظرة الناس ليا هتكون صعبة اوى عليا امل حياتى انى ارتبط بشخص شبهى فى عقله وتفكيره وتحمل أعباء الحياة مش يتجوزنى ويبهدلنى معاه أو ما يقدرش يحقق لى الحياة اللى بتمناها مع شاب لسة بيبدأ حياته مش واحد مطلق وعنده اولاد أو أرمل لأن كل اللى بيتقدمو لى مش شايفة فيهم الشخص المناسب ليا بقيت أفضل العزلة عن الناس وبدعى ربنا انى اموت رحمة من الكلام الجارح اللى بسمعه كل يوم .