سناء يونس : أحمد ذكي مشجعي الأول

كان حلم حياتي إني بس أعدي من قدام الشارع اللي بتتعرض فيه مسرحيات الاستاذ فؤاد المهندس او الاستاذ عبد المنعم مدبولي ساعتها كانوا اشهر فنانين بيقدمو مسرح و عروضهم كانت دايمآ بتبقي [ كومبليت ] كامل العدد ... و في مرة و انا بعمل بروفة لمسرحية كنت شغالة فيها لقيت حد بينده عليا و انا في عز البروفة و لما ركزت كويس لقيته أستاذ فؤاد المهندس طبعا زي العيلة الصغيرة من كتر الفرحة لقيت نفسي بقوله أنا يا استاذ ؟؟ بتنده عليا أنا ؟؟!! و من فرحتي سبت البروفة شغالة و روحت له فورآ , لقيت المخرج قال بصوت عالي ستووووب أحنا فين هنا ؟! قولت له فؤاد المهندس بيندهلي  كنت لسه بنت ريفية علي سجيتي جدآ ساعتها استاذ فؤاد أتدخل عشان المخرج ما يزعلش مني .. المهم لقيت استاذ فؤاد المهندس بيسألني أنتي بتعملي ايه ؟ قولت له بمثل تراجيدي .. قالي بلا تراجيدي بلا نكد ,أنتي مكانك مش هنا , بكره تيجي لي المسرح و لقيته راح يستاذن من المخرج عشان ياخدني .. و فعلا عملت أول رواية مع الأستاذ فؤاد المهندس , رواية كان أسمها [ حالة حب ] .. و فعلا بجد مش هزار بقيت بعدها أشهر من المحافظ اللي في محافظتي [ الزقازيق ] وكان فيه كام واحد من مجانين الفن و التمثيل بيستانوني كل مرة و انا راجعة الزقازيق عشان يستقبلوني مخصوص و لا كأني الست فاتن حمامة في زمنها و كان من ضمن الناس دي شاب أسمر بيحب تمثيلي جدآ و فخور بيا أني رفعت أسم [ الزقازيق] بالعمل مع الأستاذ فؤاد المهندس...الشاب ده هو نجمنا العظيم أحمد زكي الفنانة الجميلة و الرائعة سناء يونس تتحدث من القلب في حوار نادر لها