ابداع..طبق الفول وتوابعه

-هتاكل؟ - كافيار كالعادة . - بالزيت الحار ،ولا الحلو؟ -الحار طبعا بس ماتنساش توابعه - نعم؟ -المخلل والسلطة والبيض … زي القصة القصيرة بالضبط معاها توابع.. - مش فاهم.. - توابع القصة المكان والزمان والحدث . -والبداية والنهاية يا عم ؟ - لأ دول بعدين … -'المهم .. اروح.. - عارف الشخصية مابتكتملش الا لما تختار لها مكان معين وزمن معين . - عروستي؟ - يعني ينفع تجيي واحد من الفراعنه دلوقتي؟ - ماينفعش - هههههههههههه لأ ينفع بس دي تبقى القصة قصدي انك لما بتختار الشخصية في مكان وزمان بتوجد منطقية القصة . - برضه عروستي ؟ -يعني لو خليت الشخصية فى الفراعنه يبقي المنطق او الحدث تاريخي ، يختلف تماما عن الفانتازيا لو خليته جه العصر الحديث. - طيب بالنسبه للحدث ؟ - الحدث مكون من شخصيات ومكان وزمان ، حاجه بتحصل تأثر فى المكان والزمان والشخصيات . - زي ؟ - اي حاجه زي خناقة مثلا بين اتنين ، وتأثير دا على الشخصيات، ولو الخناقة دي بين اتنين لا يمكن يتقابلوا دا احلي. - زي مين ؟ - هتلر مع سي السيد مثلا … اهي دي فكرة قصة قصيرة جديدة. وهو انا ممكن اتخانق معاك ليه بس ؟ - جعان… اوعي بقي من وشي .