عمرو حسن.. الدرويش يُقدم النصائح لمتابعيه على "فيس بوك" تحت عنوان "نصايح لمبدع شاب"

قدم الشاعر العامي المُلقب بالدرويش، عمرو حسن، مجموعة من النصائح لمتابعيه على موقع التواصل الاجتماعي فيس بوك، تحت عنوان "نصايح لمبدع شاب"، وكانت تلك النصائح هي: - ماتردش على اشاعات ، ولاحقايق حتى ، ماتنفيش ولا تأكد ، كمّل في اللي بتعمله ، كإنك ماتعرفش حاجه ومحدش قالك - بيع الناقص ، واكتب اللي مش مكتوب ، ولما تحب تشوف بيحصل ايه بص من خرم الباب ، ماتفتحش الباب - خسايرك مكاسب ، المهم تشغّل خسايرك صح ، وتعصرها للآخر لحد ما يبقى عندك اللي يتقال - ماتطلبش تعاطف ، ولا متابعة ولا جمهور ولا غيره ، قد ماتزهد ومايبقاش همك كله هيجيلك - ماتردش على جاهل ولا أمنجي ولا مومس ، اضرب بعد ما يخلصوا كلامهم ويمشوا ، ولما تضرب اضرب جامد وقول انا ماعرفش حاجة عن الموضوع ده - الستات أنواع ، اللي هيعرفوك لاسمك واللي هيعرفوك وقت واللي هيعرفوك لوجه الله ، ادي كل واحدة طلبها بس بالطريقه ماتقولهاش في وشها ، وف الآخر كل واحدة هتعرفك هتطلع منك باللي كان تمامها بالظبط - مش المفروض تبقى كويس في عين الكل ، لا استنى ، انت اصلاً المفروش ماتبقاش كويس الا فعين ناس تتعد ع الصوابع ، انت بتعمل الفارق ، اللي هيكرهوك هيتضاعفوا ، وعندك من أول الحقد ع اللي ربنا اداهولك والنظر ف اللي وصلتله لحد الاختلاف معاك ف الرأي والحزن انك ف مكان مهم وهو ماحققش حاجه ، فالمنطق تبقى مرفوض ومكروه من البعض ، ولو الكل حبك ، تبقى وسخ - راعي مزاجك ، واشتري الحاجات اللي بتحبها أول بأول ، ولما تبقى شاطر ومطلوب خد فلوس على كل حاجة بتعملها ، انت بتنزف روحك عشان تمتع الناس ولازم تاخد فلوس وتقدير ، وكتير - ماتصرحش ، ومتظهرش ، خلي وجودك مفاجأة ، وردك على التليفون ميزة لأشخاص بعينها ، وبيتك مكافأة للي يستحقوا يشوفوا مكان ما انت عايش ، وضحكتك وحزنك طوق نجاة في حياة اللي اديتلهم ضحكتك وحزنك - ماتتواضعش وماتتكبرش ، خد مكانك بس ، وقد ماتقدر قول مش عارف ، والله أعلم ، حتى لو كان اللي بيتقال مالوش جواب غير عندك بس - لما تلاقي الناس بتشرب م البير ماتشربش معاهم ، اعمل دراسة عن فرص تواجد أبيار ف أماكن قريب واحفر واعطش ، واتعب واترمي ريقك ناشف وهما بيقولولك ( ماتيجي تشرب اهو ما الميه موجوده ومتاحه ) ، فيه يوم هتضرب فاسك ينفجر بير ، وساعتها بيع واقبض على كل بق ميه هيتاخد من بيرك ، انت دفعت تمن التثمين ، وجه الدور انهم يدفعوا تمن المجانية - أنا معرفش ، ماليش علاقة ، ماعنديش اجابة - شكلك وحضورك وطلّتك وتصريحاتك ووقفتك جزء كبير من نجاحك ، وأكبر كمان من موهبتك بشوية - ماتجريش ع الفرص ، وماتطلبش علاقات ، وماتتعرفش على حد عن طريق حد ، كمل شغلك وبيع منتجك ، لحد مايجيلك اللي كان نفسك تتعرف عليه ، ويقولك طب مش يلا بينا نشتغل سوا ؟ - انت مش قدوة ، ولا مطلوب منك ، انت مطلوب تكون بني ادم بس ، لكن مش مطلوب تكون مابتشربش ومابتشتمش ومابتغلطش ، فنك هيهذبك لوحده وابداعك هيخليك بني ادم لكن اوعى تعيش حدوتة المثالي لانك مش كده ولانهم مش كده - اللي هيعملوك النهاردة هيوقعوك بكره ، عدد اللي هيآمنوا بيك فعلاً قليل قوي ، فما تراهنش غير على نفسك وكن بطبيعتك ، ده لو حابب تنتصر - انت اشطر واحد في مجالك والكل وراك - الدواير اللي هتعرفك مش المطلوب تفضل تعرفهم ، بيكفي واحد او اتنين بس يكونوا أصليين - العالم واسع ، والفرص كتير ، وتغيير الجلد متعة ف التناول والمعالجة فاستمتع - غير أماكن تواجدك ، بدّل معارفك ، لكن حافظ على المقربين وراهن بيهم مش عليهم - انت الوحيد ف المعركة بطولك