خربشات بقلم… سمية غباشي
قلمك مع ألمي
عملوا حاجة
مش عادية
حاجة حاسة
بكل حاجة
دايرة جواية وبيه
قال كلام خلي الكلام
حتى يهرب من عنيه
بس كان محيرني
انه ازاي حس بيه
: كلمة حلوة لو نقولها
نقطة لو نفهم وصولها
جملة واحدة نتواصلها
دمعة لو نقدر نزيلها
يبقى شكل الدنيا ايه؟
حط ايدك جوة قلبك
وانزع الغل اللي فيه
حط بداله خير وحب
واحدة واحدة حس بيه
يبقى شكل الدنيا ايه؟
لو حزين امسح دموعك
مش مهم يمسحها غيرك
وابدأ انت بالسماح بينك وبينك
وارضي وخلي بسمة فوق عيونك
يبقى شكل الدنيا ايه؟
نفسي
نفسى الاقى فانوس
بس يكون مسحور
يكون حقيقي اكيد
بيطلع منه نور
وأشوف ف نوره وشوش
كتيرة حواليه
الاقى فيها الحب
بجد مش مغشوش
يشوف جوه القلوب
يدور بس حبه
ويشيل منها العيوب
ويعدل المقلوب
يكون بنور شفاف
وجرئ وعمره ماخاف
اشوف بيه المخبي
وأقول اللي ف قلبي
يسمع بلا استخفاف
يكون فانوس أحلام
فيه الفقير… ملك
ومعندهوش خدام
ومعندهوش حاشية
ولا حتى عنده عبيد
أصل الملك عادل
يكون فانوس ألوان
اشوف بنوره الورد
والقمح بلون الدهب
مبدور في كل الأرض
وبنوره اشوف بلدي
من اجمل البلدان.
نفسى
حنين
عاوزة اتنطط تنطيط
وأزقطط فى اللخابيط
وأرجع تانى بضفاير
وأشب لحد الحيط
بس خسارة مش هاقدر
أصلى كبرت وشبيت
واشتقت كتير لطفولتى
ولألوانى وكتبى وكراستى
ولبابا نويل ولصورة
كانت محطوطة عالحيط
مربوطة بطرف الخيط
وشرابى بألوان فاقعة
كنت بألبسه فى السقعة
ولساعة حروفها كتيرة
ولصورة مامتى كبيرة
وسرير أوضتى ودولابى
وصور ليه أنا وصحابى
ولصورتى وأنا بضفاير
وبأشب لحد الحيط
وعلامة مقاسات طولى
ولعقد أبيض م اللولى
كنت بألبسه وانا رايحة
كل حفلات مدرستى
ولصورة بغبغانات
كنت باحبها بالذات
كان خالى اللى راسمهالى
خلانى ألون فيها
ورد ه وريشه وخطوط
بصيت ف ده كله لقيت
نفسى أرجع لطفولتى
لكن أبدا ولا ينفع
أصلى كبرت وشبيت
وطولت أكتر م الحيط:
بتقسي ليه
انا ماملكش غير
نفسي واحساسي
لكن عندي كلااااام
نفسي اقولهولك
ومتأكد اكيد يعني
انك فاهمة و مش
قادرة في عيني
تفتحي عيونك
قسيتي كتير وبراحتك
ولسه كمان؟ وسامحتك
لكن لسه بتقسي وواثقة
من اني مفيش حاجة
في أيدي اعملها غير حبك
رميت قلبي في احضانك
وكان عشمي الاقي الحب
ولا الاقي مكان على بابك
منين ماادق يفتحلي
لقيتك قافلة كل بيبان
العقل والإحساس ولا ف بالك
حاولت أكره حاولت أبعد
ولكني… ولا استحملت
بحبك وانت رامياني
وحبك أصله جوه القلب
فأرجوكي عشان خاطر
شعاع شمسك يدفيني
وقلبي المكسور الخاطر
وارجوكي عشان خاطر
نجوم الليل
وارجوكي بحق النيل
والمواويل
وكل مابينا ياحبيبتي
بحق الحب.. بصي لي
وحني شوية…. وحبيني
بأحن ساعات… لاغلي ساعات
سرحت بفكري ورحت بعيد
وسألت ليه أنا مش سعيد
مابين يومي وبين أمسى
فيه حاجات راحت كتيرلبعيد
وناس ماتت وناس عايشة
وناس سافرت لأقصى بعيد
لقيت الدنيا محتاجة
تتغير في ميت حاجة
عشان ترجع تاني حلوة
وأحس بمعنى فى الغنوة
وأقول كلمات فأشعاري
تفرح قلبي وتخلي
البعيد تانى بقى يرجع
تفتكروا إن ده ينفع؟
وقالوا الدنيا دوارة
واستغبي وأقول يعني
هتلفلف وتاني ومن
جديد ترجع
وأشوف بابا وأشوف ماما
وأشوف أخواتي وحبايبي
وكل عزيز غالي عليه
وقابل ربه وهجرني..
تفتكروا إن ده ينفع؟
وحشني كلامي
مع بابا
ودلعي كمان
على ماما
وحتى لعبي وغنايا
مع أخواتي على السلم
وآه من فرقة الاحباب
ولو قلت لزماني
يعود تاني من الاول
اكيد عمره ماهينفع…
الشرنقة
صحيت انا من نومى
لقيت الدنيا…ضيقة
وحاجات كتير.. مزنقة
ووشووش عجيبة..مخنقة
احترت …وعرفت ليه
منا لسه جوة الشرنقة
قلت لما اخرج شوية
يمكن احس بالوسع
وخرجت واحدة ..واحدة
ورميت المى ف جنابى
علشان لو حد قرب
مايحسش بالوجع
أتارى الدنيا ديه
على قد كل براحها
وبوسعها وشوارعها
وبناسها واللى فيها
أضيق اضيق كتييييير
من ضيق الشرنقة
ولقت الضيق وسع
والزنقة فيها دفا
والخنقة تهون معايا
وانا جوه نفسى لوحدى
ورجعت تانى دخلت
جوه الشرنقة…….
تمت
