ارمى الشبكة

بقلم الشاعرة إيناس السيد

ارمى الشبكة ياصياد
شوف حيطلع ايه فيها
خد رزقك ولأم الولاد
وخد للولاد وكفيها
حتلقى فى السمك أموات
لابد لازم ترميها
متفرحشى أوى بكتير
المهم اللى عاش فيها
ومتقولشى راح أبيع الميت
طالع من البحر بالديناميت
مترضاش سم لاولادك
مترضاهوش لأى بيت
خلى الضمير حاكمك ولو
حيجوعوا متلتقيش الزيت
متبصش للى واصل فين
وميغركش علو الصيت
بكرة حيقفوا وحديهم
وحتقف إنت كمان وحديك
تشوف الفقر عنديهم
وتشوف الغنا عنديك
ده هى ثوانى قوام حتفوت
متفكرش زمن وطويل
خطف ياما كتير الموت
عيش بنضافة ع التساهيل