صباح الفل من ”نكلا”صباح الخير

الشاعر علام أنور
صباح الفل من ”نكلا”صباح الخير

وناس ع المولي متكله وأملها كبير
صباح الخير علي ولادنا ومدارسهم
وع الحلم اللي راسمينه في كراريسهم
ورود مبدوره في السكه
ومصروفهم يادوب فكه
يارب احميهم احرسْهم
صباح الورد ع الناس اللي شقيانه
وم الفجريه تعبانه
صباح العلم يا دارس في كليه
صباح الشغل يا خواتي الصنايعيه
صباح الخير علي عيالهم
صباح الخير علي القطر إللي وصلهم
لجامعتهم وأشغالهم
صباح الرزق يا محلات
صباح الخير علي اخواتي ولاد وبنات
صباح الزرع والخُضره وحاجات نِفعت
صباح قرءان بصوت شيخنا الجميل رفعت
صباح الفل ع اللي يقول وع اللي مقالش
علي صحابي…وأحبابي
وحتي إللي اتشغل منهم ومبيسألش
صباح الفووووول وعربيته
وعم رؤف وطعميته
صباح الفل ع الجامع بتاع البحر والمدنه
ومشايخنا وأسيادنا
مسيحي في” نكلا ”أو مسلم
بنتشارك في احزاننا
وأفراحنا واعيادنا
صباح الخير يا ”كوبري” حديد
ياشايل كل خطاوينا
وكل دقيقة حمله يزيد
وعمره ميشكي رجلينا
صباح الفل ع المركب وع الصياد
صباح الخير دي كلمه كل يوم تتعاد
صباح الفل من ”نكلا ” صباح الخير
وناس ع المولي متكله واملها كبير