بالبلدي.. العرق سوس

بقلم… سمية غباشي

الدنيا حر.. ودرجة الرطوبة عالية.. والكهرباء فاصلة..والمياه رافضة تطلع فوق..إيه ده؟؟…هو فيه إيه؟.. الأسعار نار …والأخلاق في دمار…أيوة الأخلاق في النازل.. رشوة وفساد.. واغتصاب وانحرافات ومحدش نافع غير اللي بيرقصوا بالصاجات …

عالم عجيب..الهم احفظنا يا رب….بياع العرقسوس ماشي في الشارع بيشخلل بالصاجات …يعنى ..تحس معاه بشوية طراوة من نوع خاص..وخصوصًا لما تشرب كوباية العرقسوس..ساقعة ومتلجة ..تريحك شوية ..وبعدين …ترجع للي كنت فيه تاني .
وعلى غير ذكرى لاقيتني افتكرته ..روميو..يا ترى عامل إيه وهو فين دلوقتي؟ وحياته عامله إيه ؟ اتبدلت؟طيب للأحسن ولا يا ساتر هتبقى أوحش من كده إيه ؟؟
كان اسم روميو اسم الشهرة الذي أطلق عليه من دونجوانيته يعنى ومعاكسته للبنات ما هو أصله كان حفيد لجد خلبوص من بتوع زمان شوية.. اللي كانوا بيعوجوا الطربوش على جنب ويحطوا الوردة في عروة الجاكيت.. وواخد باله خالص من نفسه ..كان يقعد ع القهوة ولا الباشا في زمانه وعزه..ومكانش يستحى يعاكس دي ويشاغل دي ويدلع اللي رايحة واللي جاية …. وبشهادة كل الستات إن دمه خفيف ويحكوا عن نوادره معاهم وهات يا ضحك وكانت سيرته ماده للتسلية عند الستات وبصراحة ربنا عمره ما خرج عن حدوده هو آخره كلام وبس … وبرضه بشهادة الستات.
المهم ده كان الجد خلبوص والأب إيه بقى بصباص درجة أولى وبجح شويتين ويعنى جد خلبوص دمه خفيف وأب بصباص وبجح شويتين ورث منهم ده مع ده على شوية تجديد من عنده على شوية كاجولة وشوية فنكنة وحبتين كتار شوية روشنة وبقى واد إيه روميو خالص والبنات الهبلة كتير مع أزمة الجواز وزيادة العنوسة …مكانش فيه يوم يعدي إلا وعامل مشكلة وتيجي جارة من الجارات تحكى بقى ده عمل كذا وضحك على فلانة وأذى علانة والبنات مش بيتعلموا …ما هو الحق مش عليه الحق عاللي بتديله الفرصة يعمل معاها كده آه أمال إيه ..أصل الواد مقضيها وعايش آخر حاجة والبنات خايبة…..أهو يظهر شوية ويختفي شوية ..وبقاله شوية مش باين من آخر مصيبة عاملها….كانت أمي تستمع وتستغفر وتستعيذ.
سمعنا شخللة بياع العرقسوس…فجأة قالت ماما العرق سوس …قلتلها عاوزة عرقسوس …..قالت عرقسوس إيه وتمر هندى إيه ..شوفوا جده إيه وشوفوا أبوه إيه ..يبقى الولد إيه؟؟ أنا مش عاوزة عرقسوس أنا بأقول على الولد ده إن أصل الحكاية بالبلدي إن العرق سوس.
تمت.
من كتاب إبليس لايدخل الجنة