المنتصر بالله…قصة فنية حزينة منذ الولادة

تقرير تكتبه: مها كمال

-ليش سموك “المنتصر بالله” ؟؟

=فيه وقت ؟؟

-خد راحتك

=والدي خلف ولد سماه عزت قعد سنة او سنة ونص والولد ده مـ. ـات .. قام والدي خلف ولد تاني وسماه عزت برضو قعد سنتين ومـ. ـات .. قام والدي خلف ولد تالت وسماه عزت ومـ. ـات برضو

-دي نكتة ؟!

=لا دي حقيقة ما انا عشان كده سألتك في الأول عندك وقت وبعدين ضحكنا كتير نزعل شوية بقى .. المهم جه والدي قعد يناجي ربه وقال “ألاه هو انا كل ما اجيب ولد تاخده مني ؟! يعني انت بتحب ولادي للدرجة دي ؟؟ طيب انا اذا جالي ولد تاني هحط اسمك فيه” .. تيمنا باسم عزت والدي أول ما خلف ولد تاني سماه “المعتز بالله” قعد سنة واتنين وتلاتة كان الولد التاني جه فقال ده ربنا نصرنا لان هو من الصعيد بيحبوا الولاد فلما قال ربنا نصرنا راح مسمي الولد اللي لسه مولود ده “المنتصر بالله” وده اسمي .. هل تحب اكملك بقية أخواتي ؟؟

-لا خلاص

=أصل فيه محفوظ بالله ، ومحفوظة بالله ، واكرام الله ، ونعمة الله

-ما شاء الله ، الله يخليهم كلهم

=الوحيد اللي مجاش اعوذ بالله