مطبات الوجع

الشاعر..هاني آدم

نص_جديد

بين مطبات الوجع
و فوق مخدات الأمانى
قبل ما يغمض عنيه
جدع إتخدع أكتر ما إتشاف
شفاف لكن جواه حاجات
م النور بتخاف
بتصلى فى الليل ركعتين
عشق و حنين
غصبن عن الجرح إللى علم
فى الهدوم
بتقوم فى باله الفكره يركب
خيل أحلامه
ترجع تموت فيه الحقيقه
بدون عزا
مجرم فى حق حبايبه قالوا
يا حبذا
مفضلش من سيرة الجدع
غير ذكريات
بتطل ضحكه شقيه
لابسه عيون غزال
من بين سطوره المجرمه
فى حق المجاز
و بين مشاعره المغرمه
بصوره فى البرواز
ملامح الأب إللى رافضه
تكون سراب
باب لسه محطوطه
فوقه يافطه نحاس قديمه
شارع لعبت الكوره فيه
و عاكست بنات
عمر إتسرق
من غير ما أكون فيه رد فعل
أحلام قديمه و كام قصيده الدود واكلهم
مربوطه بينهم و بين حياتى
سكة سفر
كتف الحمول مهما استباحت تذل فيه
بيكل من راحته و هناه
غاوى غلب و آه
ذنب إتغفر
طلت عليا حوريه من بين السطور
بتقولى شعرك شاب خلاص
و المشكله ان المشكله
مش لاقيه حل
فى ناس قدرها تعيش على هامش القصيده
و ناس عنيده تحب تغرق
أو تموت
جوه القصيده
جديده فكرة إنك تموت جوه القصيده
و تسيب أثر يتحدى عمرك بالسنين
جديده فكرة إنك تعيش
أطول من عمرك
و تقول لكل حبايب آسف إنى مشيت
بين مطبات الوجع