لسه ياشعب

خواطر للشاعر محمد الشرقاوي

( ١ )

لسه يا شعب بتعشق كورة ؟!

لسه بتعشق فن سخيف ؟!

وانت الخارج بره الصورة ،

وانت الطالب نص رغيف .

( ٢ )

لسه يا شعب بتعشق بيكا ؟!

لسه بترقص ع التفاهات ؟!

خليك عايش في المزيكا ،

خليك تايه في الظلمات .

( ٣ )

لسه يا شعب تنادي سيجارة ؟!

لسه بتحرق قلبك فيها ؟!

ألف ندامة وألف خسارة ،

نعمة ربك تغدر بيها .

( ٤ )

لسه يا شعب بتعشق ميسي ؟!

وشايفه حكاية من الأساطير ؟!

لص بيقتل أملي وغرسي ،

ويعمل كل حياتنا سعير

( ٥ )

لسه يا شعب بتسهر ليلك ؟!

ضمنة وشيشة وطاولة كمان ؟!

خليك نايم بس يا ويلك ،

اوعى تئن من الأحزان .

( ٦ )

لسه يا شعب بتحلم يوم ،

إن عدوك يبقى حبيب ؟!

أنت بجد كتير موهوم ،

وحدك عايش فكر عجيب .

( ٧ )

لسه يا شعب بتطلب رحمة ،

عند الشرق وعند الغرب ؟!

أرضك زرع وكنز ولحمة ،

انهض واغلب كل الصعب .

( ٨ )

لسه يا شعب بتحرق خضرة ؟!

علشان تبني مكانها بيوت ؟!

غاوى مناظر غاوى الشهرة ،

من غير زرع الناس بتموت .

( ٩ )

لسه يا شعب بتخدع نفسك ؟!

لما ابنك ينجح بالغش ؟!

ولا يوم عارف يكتب اسمك ،

ولا بيغادر باب العش .

( ١٠ )

لسه يا شعب قاعد بتشاهد ؟!

كل بلاد الكون في صعود ؟!

وانت لوحدك فكرك جامد ،

نايم تحلم فجر يعود .